ပြီးပြည့်စုံသော စားသောက်ဖွယ်စာရင်း အခြေခံအချက်များ

 ယခင်လမှအဆက်

          မြန်မာစားဖိုမှူးများအတွက် လုပ်ငန်းခွင် လက်တွေ့အသုံးချပညာရပ်များကို “Myanmar Chefs Development Centre’’ ရဲ့ “Myanmar Chefs Development Centre’’ မှာ လစဉ် ဖော်ပြပေးနေပါတယ်။ ပြီးခဲ့တဲ့လမှာတော့ စားဖိုမှူးများအတွက် အထူးအရေးကြီးပြီး သေချာစွာသိရှိထားရမယ့် အသိပညာများကို ဖော်ပြပေးခဲ့ပါတယ်။ ဟိုတယ်နှင့် စားသောက်ဆိုင်များမှာ “စားသောက်ဖွယ်စာရင်း” (Menu) ဟာ မရှိမဖြစ်လိုအပ်ပါ တယ်။ စားသောက်ဖွယ်မျိုးစုံကို  စနစ်တကျအစီအစဉ်ကျနစွာ ဖော်ပြပေးဖို့ လိုအပ်သလို အစားအစာများရဲ့ ပါဝင်ပစ္စည်းများနှင့် ကျသင့်ငွေဈေးနှုန်းများကိုပါ ဖော်ပြပေးရန်လည်း လိုအပ်ပါတယ်။ စားသောက်ဖွယ်စာရင်း (Menu) များကို ပြင်ဆင်ရာမှာ စားဖိုမှူးများ အထူးသတိပြုဆောင်ရွက်ရမယ့် အချက်အလက်များကို အောက်မှာ ဆက်လက်ဖော်ပြ ပေးလိုက်ပါတယ်။ စားသောက်ဖွယ်စာရင်း ပြင်ဆင်ရာမှာ ထည့်သွင်းစဉ်းစားရမယ့် အချက်များထဲမှ (၃) ပြီးပြည့်စုံသော စားသောက်ဖွယ်စာရင်း အခြေခံအချက်များ။ (Compile a Basic Menu)  နှင့်  ပတ်သက်သောအကြောင်းအရာများကို ပြီးခဲ့တဲ့လမှာ စတင် ဖော်ပြပေးခဲ့ပါတယ်။ ဒီလမှာတော့ “စားသောက်ဖွယ် စာရင်း (Menu)”များကို ပြင်ဆင်တဲ့အခါ အဓိကထားထည့်သွင်းစဉ်းစားရမယ့် အခြေခံအချက်များဖြစ်သော (၃) ပြီးပြည့်စုံသော စားသောက်ဖွယ်စာရင်းအခြေခံအချက်များ။ (Compile a Basic Menu) ကို အဆုံးသတ်ဖော်ပြပေးသွားပါ့မယ်။

(ဃ) အရည်အသွေးပြည့်ဝသော ကုန်ကြမ်းများ။ (Valuable Supplies)

          စားသောက်ဖွယ်စာရင်းတစ်ခုကို ပြင်ဆင်သည့်အခါ အဆိုးရွားဆုံး အခက်အခဲ ကတော့ စားသောက်ဖွယ်စာရင်းတွင် ထည့်သွင်းဖော်ပြထားသော စားသောက်ကုန် ကုန်ကြမ်းလုံးဝမရရှိနိုင်ခြင်းပင် ဖြစ်ပါသည်။ ကုန်ကြမ်းများ၏ ရရှိနိုင်သော အချိန်ရာသီ ကာလ မဟုတ်ခြင်း (သို့) လုံးဝရရှိနိုင်ခြင်းမရှိသော ကုန်ကြမ်းဖြစ်နေခြင်းတို့ဖြစ်သည်။ မိမိ လက်ရှိပြင်ဆင်နေသော စားသောက်ဖွယ်စာရင်းကို သေချာစွာလေ့လာစုံစမ်းပြီးမှ အစဉ်အမြဲ (သို့) အချိန်ကာလ အပိုင်းအခြားအလိုက် ရရှိနိုင်သော ကုန်ကြမ်းများကို ရွေးချယ်ထည့်သွင်းသင့်ပါသည်။ ဥပမာအားဖြင့် အသားမျိုးစုံ၊ ငါးနှင့် ပင်လယ်စာမျိုးစုံ၊ အသီးအနှံနှင့် ဟင်းသီးဟင်းရွက်များကို သေချာစွာ ရွေးချယ်ပြင်ဆင်ထားရန် အထူးလိုအပ် ပါသည်။ ကုန်ကြမ်းများ၏ အရည်အသွေးသည် အချိန်ကာလရာသီအလိုက် မှန်ကန်စွာ ရရှိပါက လတ်ဆတ်မှုရှိသလို ဈေးနှုန်းလည်း ချိုသာတတ်ပါသည်။ နောက်ထပ် အထူးသတိထားရမည့် အချက်တစ်ခုမှာ မိမိ၏ ဟိုတယ်၊ စားသောက်ဆိုင်၊ လုပ်ငန်း၏ တည်နေရာနှင့် ရာသီဥတု၊ အခြားသော ထူးခြားအခြေအနေများအားလုံးကိုလည်း စားသောက်ဖွယ် စာရင်း ပြင်ဆင်သည့်အခါတွင် လုံးဝထည့်သွင်းစဉ်းစားထားရပါမည်။ ဥပမာအားဖြင့် ကုန်းတွင်းပိုင်း၊ တောင်ပေါ်ဒေသ၊ ပင်လယ်အတွင်းရှိ ကျွန်းများ၊ သဲကန္တာရ၊ ရေခဲတောင်တန်းများ စသည်ဖြင့် သွားလာရန်နှင့် သယ်ယူပို့ဆောင်ရေး အနည်းငယ် ခက်ခဲသောနေရာများဖြစ်နေပါက မိမိအသုံးပြုမည့် ကုန်ကြမ်းများအား လွယ်ကူမြန်ဆန် လတ်ဆတ်စွာ ရရှိနိုင်ခြင်း ရှိ၊ မရှိ ထည့်သွင်းစဉ်းစားထားရန် လိုအပ်ပါသည်။ ထို့ကြောင့် မိမိပြင်ဆင်သော စားသောက်ဖွယ်စာရင်းတွင် ထည့်သွင်းမည့် ကုန်ကြမ်းများသည် အများအားဖြင့် မိမိလုပ်ငန်း၏ အနီးပတ်ဝန်းကျင်တွင် အစဉ်အမြဲသော်လည်းကောင်း၊ အချိန်ရာသီကာလအလိုက်သော်လည်းကောင်း လွယ်ကူစွာရရှိနိုင်သော ကုန်ကြမ်းများကို ဦးစားပေးထည့်သွင်း စဉ်းစားရမည်ဖြစ်ပြီး အဝေးမှ မှာယူရရှိနိုင်သော ကုန်ကြမ်းများကိုလည်း လုံလောက်စွာ ကြိုတင်မှာယူ သိုလှောင် သိမ်းဆည်းထားရန် အထူးလိုအပ်ပါသည်။ မိမိ၏ တည်နေရာဒေသထွက်ကုန်များသည် ပိုမိုအရည်အသွေး ကောင်းမွန်ပြီး ဈေးနှုန်းချိုသာမှုကို အစဉ်အမြဲ ထည့်သွင်းစဉ်းစားထားရပါမည်။

(င) အစားအစာများ၏ သမမျှတမှုရှိခြင်း။ (Balance Menu)

          စားသောက်ဖွယ်စာရင်း ပြင်ဆင်ရာတွင် အကြီးမားဆုံး အခက်အခဲအဖြစ် ထည့်သွင်း စဉ်းစားရမည့် အချက်တစ်ခုမှာ အရသာ အပျော့အပြင်းနှင့် ပမာဏအနည်းအများ၊ အရည်အသွေးမြင့်ကုန်ကြမ်းများ၏ ပမာဏနှင့် အရသာအပျော့အပြင်းတို့ပင် ဖြစ်ပါသည်။ သေချာစွာ ခြုံငုံစဉ်းစားသုံးသပ်ပြီးမှ ထည့်သွင်းပြင်ဆင်ရပါမည်။ သမမျှတမှုရှိစွာ ပြင်ဆင် ထားသော စားသောက်ဖွယ်စာရင်းတွင် စားသောက်ကုန်များကို မလိုအပ်ဘဲ ထပ်ခါ တလဲလဲ အသုံးမပြုခြင်း၊ အလှဆင်ရန် အသုံးပြုသော ဟင်းခတ်အမွှေးအကြိုင် အရွက်မျိုးစုံတို့ကို ထပ်ခါတလဲလဲ အသုံးမပြုခြင်း၊ တွဲဖက်အစားအစာများ၊ ကစီဓာတ်နှင့် ဟင်းသီးဟင်းရွက်များကို ထပ်ခါတလဲလဲ အသုံးပြုခြင်းတို့ကိုလည်း အထူးသတိထား ရှောင်ကြဉ်ထားရပါမည်။ ဥပမာအားဖြင့် ထမင်းဖြူ၊ အာလူး၊ ပဲမျိုးစုံ၊ နံနံပင်၊ ပင်စိမ်း စသည်တို့ကို ထပ်ခါတလဲလဲ ဟင်းလျာမျိုးစုံတွင် အသုံးမပြုရပါ။ အထူးသဖြင့် အစား အစာများ၏ အနံ့နှင့် အရသာများသည် မတူကွဲပြားပြီး ဆင်တူသော အနံ့အရသာများ မဖြစ်စေရပါ။ အနံ့ အရသာ စုံလင်ပြီး သမမျှတသော စားသောက်ဖွယ်စာရင်း ဖြစ်နိုင်ရန် အစဉ် သတိထားရပါမည်။ ဟင်းလျာများ ချက်ပြုတ်ရာတွင်လည်း ချက်ပြုတ်နည်းမျိုးစုံ အသုံးပြု ပြင်ဆင် ချက်ပြုတ်ထားသော စားသောက်ဖွယ်စာရင်းဖြစ်ရန် လိုအပ်ပါသည်။ ဥပမာအားဖြင့် အကြော်၊ အပြုတ်၊ အကင်၊ အပေါင်း စသည်ဖြင့် ချက်နည်းစုံစွာ ထည့်သွင်း ပြင်ဆင်ထားရန် လိုအပ်ပါသည်။ အထူးသတိပြု ပြင်ဆင်ရမည့် နောက်ထပ်အချက်တစ်ခုမှာ စားသောက်ဖွယ်များကို အလှဆင်ခြင်းနှင့် ပြင်ဆင်ချက်ပြုတ်ခြင်းများကို အစဉ်အမြဲ မှန်ကန်စွာ လုပ်ဆောင်ရန်နှင့် မလိုလားအပ်သော ထပ်ခါတလဲလဲအလှဆင်ပုံ၊ ပြင်ဆင် ချက်ပြုတ်နည်း၊ အနံ့အရသာများ ကွဲပြားခြားနားမှုမရှိခြင်းတို့ကို အထူးသတိပြု ထည့်သွင်းစဉ်းစားရပါမည်။ (ဆက်လက်ဖော်ပြပါမည်)

          စားသောက်ဖွယ်စာရင်း ပြင်ဆင်ရာမှာ ထည့်သွင်းစဉ်းစားရမယ့် အချက်များထဲမှ (၃) ပြီးပြည့်စုံသော စားသောက်ဖွယ်စာရင်း အခြေခံအချက်များ။ (Compile a Basic Menu) နှင့် ပတ်သက်သော  အကြောင်းအရာများကို  အသေးစိတ်ဖော်ပြပေးခဲ့တာ ဖြစ်ပါတယ်။ လာမယ့်လမှာ ဖော်ပြပေးမယ့် “Myanmar Chefs Development Centre’’ MCDC, Yangon ရဲ့ “Chef Education Page’’ မှာ ဆက်လက်ဖော်ပြပေးသွားမှာမို့ ဆက်လက်အားပေးလေ့လာနိုင်ပါတယ်။

          ‘‘Welcome to MCDC, Yangon”, “Be a Chef by Yourself’’ ‘‘See you next month’’.

Chef Sunny

Secretary General

Myanmar Chefs Development Centre, Yangon. (M.C.D.C, Ygn:)

Facebook Comments