လေးညှင်းပွင့် (စွဲမက်ဖွယ် ဟင်းခတ်အမွှေးအကြိုင်တစ်မျိုး)

by နှင်းဝေဦး for Food Magazine

          လက်တင်ဘာသာစကား Clove မှ ဆင်းသက်လာပြီး “လက်သည်း” ဟု အဓိပ္ပာယ်ရသည်။ သံမှိုသဏ္ဌာန်ရှိ လေးညှင်းပွင့်သည် ပန်းအိပင်မျိုးနွယ်ဝင် အပင်တစ်မျိုးမှ သေချာရွေးထုတ်ထားသော အဖူးလေးများကို အခြောက်ခံထားခြင်းဖြစ်သည်။

          အရွယ်သေးငယ်သော်လည်း အနံ့မွှေးကြိုင်သော လေးညှင်းပွင့်ကို ချက်ပြုတ်နည်းတိုင်းလိုလိုတွင် ထည့်သွင်းအသုံးပြုကြပြီး ချိုသောဟင်းလျာများနှင့် အရသာကဲသော ဟင်းလျာများတွင်လည်း ထည့်သွင်းချက်ပြုတ်ကြသည်။ တရုတ်မဆလာ၊ ပြင်သစ် ဟင်းခတ်အမွှေးအကြိုင်၊ အိန္ဒိယမဆလာ၊ မော်ရိုကိုဟင်းခတ်အမွှေးအကြိုင်အရော၊ ဗြိတိသျှသုံး အပူပေး ဝိုင်ဟင်းခတ်နှင့် အမေရိကန် ရွှေဖရုံဟင်းခတ်တို့ အပါအဝင် ကမ္ဘာတစ်လွှားရှိ ချက်ပြုတ်နည်းများ၊ ဟင်းအနှစ်များနှင့် အဖျော်ယမကာများတွင်ပါ ပါဝင်ပစ္စည်းတစ်ခုအဖြစ် သုံးစွဲလာပြီဖြစ်သည်။

          အကောင်းဆုံး လေးညှင်းပွင့်များကို မလေးရှားနိုင်ငံ ပီနန်ဒေသမှ ရရှိသည်။ အဖူးများ ပကတိအတိုင်း ရှိနေသေးသော လေးညှင်းပွင့်ကို ရှာယူပါ။ အရိပ်ရပြီး အေးမြသော မီးဖိုဆောင်နှင့် ဆိုင်များတွင် အလုံပိတ်သိမ်းဆည်းထားသည့် လေးညှင်းပွင့်များကို အသားစတူး၊ ဆော့စ်၊ သစ်သီးယိုနှင့် ခရစ္စမတ်ဝက်ပေါင်ခြောက်များ ချက်ပြုတ်ရာတွင် သုံးနိုင်သည်။ သို့သော် ဟင်းလျာတည်ခင်းခါနီးတွင် လေးညှင်းပွင့်များဖယ်ရှားရန် မမေ့ပါနှင့်။

          အင်ဒိုနီးရှားနိုင်ငံ မာလူကူကျွန်းဟု လူသိများသော အရောင်အသွေးစုံလင်လှသည့် ဟင်းခတ်အမွှေးအကြိုင်များရှိရာ ယခင် Moluccas ကျွန်းတွင် လေးညှင်းပွင့်ကို ရှာဖွေ တွေ့ရှိခဲ့သည်။ ဇာတိပ္ဖိုလ်သီး၊ ဇာတိပ္ဖိုလ်ပွင့်နှင့် ငရုတ်ကောင်းတို့ ရှင်သန်ပေါက်ဖွားပြီး သီရိလင်္ကာ၊ ဘရာဇီး၊ တန်ဇန်နီးယား၊ မော်ရေးရှပ်စ်နှင့် မဒါဂတ်စကာတို့တွင် စီးပွားဖြစ် စိုက်ပျိုးလျက်ရှိသည်။ ပြောင်လက်၍ အမြဲစိမ်းစိုနေသော အရွက်များနှင့် စွဲမက်ဖွယ် လေးညှင်းပင်များသည် ပန်းရောင်သန်းသောအဖူးကလေးများနှင့် စူးရှသော ရနံ့မွှေးမွှေး ရှိသည့် အပူပိုင်းဒေသပေါက် အပင်များဖြစ်ကြသည်။ အပင်တစ်ပင် ရှင်သန်ကြီးထွားရန် အနည်းဆုံး အချိန် ၈ နှစ်ခန့် ကြာမြင့်သည်။ အပွင့် မပွင့်ခင်  အဖူးကလေးများကို လက်ဖြင့် ခူးဆွတ်ပြီးမှသာ တောက်ပသောပန်းရောင်သို့ ပြောင်းလဲသွားကြသည်။

          ဤမျှရှေးကျသော ဟင်းခတ်အမွှေးအကြိုင်မျိုးသည်  ဥရောပမီးဖိုချောင်များထဲသို့ အလယ်ခေတ်လောက်မှစ၍ ရောက်ရှိလာခဲ့သည်။ အဆိုပါ လေးညှင်းပွင့်ခြောက်လေးများ၏ ဆေးဖက်ဆိုင်ရာနှင့် အချက်အပြုတ်ဆိုင်ရာ အသုံးဝင်ပုံတို့ကို သိရှိသွားကြပြီး ဘုရင်နှင့် အရပ်သူ၊ အရပ်သားများပါ ကြိုက်နှစ်သက်ခဲ့ကြသည်။ အဆိုပါ အဖိုးတန် ဟင်းခတ်အမွှေးအကြိုင်ကို ဝယ်ယူလိုသူ ပေါများလာခြင်းကြောင့် ပင်လယ်ပျော် စူးစမ်းရှာဖွေသူများလည်း ငွေကြေးကြွယ်ဝချမ်းသာသွားပြီး နောက်ပိုင်းတွင် အရေးပါသော ကုန်သွယ်မှုတစ်ခုအဖြစ် ပေါ်ပေါက်လာခဲ့သည်။

          လေးညှင်းပွင့်ကို ဆေးဝါးအဖြစ်အတွက်သာမက  အစားအသောက်များ တာရှည်ခံစေရန်အတွက် အသုံးပြုခဲ့ကြသည်မှာ နှစ်အတော်ကြာပြီဖြစ်သည်။ တတိယရာစုနှစ်အတွင်းက တရုတ်တိုင်းရင်းဆေးများတွင် လေးညှင်းပွင့်ကို အစာမကြေခြင်း၊ အော့အန်ခြင်းနှင့် သွားကိုက်ခြင်း ဝေဒနာတို့အတွက် ထည့်သွင်းအသုံးပြုခဲ့ကြသည်။ လေးညှင်းပွင့်တွင် ပါဝင်သော eugenol  ဓာတ်ပစ္စည်းတစ်မျိုးတွင် ဓာတ်တိုးတားဆီးမှုသတ္တိ (anti-oxidant)၊ ဗက်တီးရီးယားသေစေသော အာနိသင် (antibacterial) နှင့် မှိုကြောင့် ဖြစ်ပွားစေနိုင်သောရောဂါများ ကာကွယ်ပေးနိုင်သည့် အာနိသင် (antifungal) စသည့် ဂုဏ်သတ္တိများ ပါဝင်နေသည်။ ယနေ့ခေတ် ပဋိဇီဝဆေးများကို ခုခံအားရှိသော ဗက်တီးရီးယားပိုးများ တိုးပွားလာခြင်းကြောင့် ခုခံအားမဲ့ ဗက်တီးရီးယားပိုးများ သေစေနိုင်သည့် လေးညှင်းဆီကို အဆိုပါပြဿနာရပ်အတွက် အဖြေတစ်ခုထွက်လာစေရန် ဆက်လက်လေ့လာမှုများ ပြုလုပ်နေကြသည်။

Facebook Comments

Menu