အစာဓာတ်မတည့်ခြင်း (Food Allergenicity) အစာတောက်ခြင်း (Food Intolerance)

by စီစီဝင်း (Food) for Food Magazine

          အစားအစာများသည် လူတိုင်းအတွက် စိတ်ကျေနပ်မှုရှိစေသော်လည်း အချို့သော အစားအစာများသည် လူနည်းစုအတွက် အန္တရာယ်ဖြစ်စေနိုင်သည်ကို တွေ့ရှိရပါသည်။ အစာကြောင့် ဖြစ်ပွားစေနိုင်သော ပြဿနာအနည်းငယ်ကို အောက်တွင် ရှင်းလင်း တင်ပြထားပါသည်။

အစာဓာတ်မတည့်ခြင်း (Food Allergenicity)

          အစာဓာတ်မတည့်မှုမျိုး ဖြစ်ပွားစေသည့် အစားအစာများ (Food Allergens) မှာ-

၁။  မြေပဲနှင့် မြေပဲပါဝင်သော အစာများ (Peanuts and Peanut Products)

၂။  အပင်မှရသော အသီးအဆန်များ (Tree Nuts)

၃။  ဥနှင့် ဥပါဝင်သော အစားအစာများ (Eggs and Egg Products)

၎။  ငါးနှင့် ငါးပါဝင်သော အစားအစာများ (Fish and Fish Products)

၅။  ဂျုံနှင့် ဂျုံပါဝင်သော အစားအစာများ (Wheat and Wheat Products)

၆။  ပဲပုပ်နှင့် ပဲပုပ်ပါဝင်သော အစားအစာများ (Soybeans and Soya Products)

၇။  နို့နှင့် နို့ပါဝင်သော အစားအစာများ (Milk and Milk Products)

၈။  နံနံပင် (Celery)

၉။  မုန်ညင်း (Mustard)

၁၀။  နှမ်းစေ့များ (Sesame Seeds)

၁၁။  ဟင်းခတ်အချိုမှုန့် (Mono Sodium Glutamate i.e. MSG)

၁၂။  အဝါရောင်ဆိုးဆေး (F & C Yellow Colour No.5)

၁၃။  ဆာလဖိုက်များ (Sulfites)

၁၄။  အခွံမာ ပင်လယ်ထွက်အကောင်များ (Crustaceans ခုံး၊ ကမာ)

၁၅။  ဂျယ်လတင် (Gelatin)

၁၆။  ပရိုတိန်းမှ ပြိုကွဲ၍ ရသောအစာ (Hydrolysed Protein)

          (ထိုင်းနိုင်ငံ Me Khong University, ၂၀၁၇ ခုနှစ်မှ လက်ခံရရှိသော စာရင်းဖြစ်ပါသည်။)

          သာမန်ဓာတ်မတည့်မှုမျိုးထက် ပြင်းထန်သော ဓာတ်မတည့်မှုမျိုး ဖြစ်လာပါက အသက်အန္တရာယ်ပင် ဖြစ်လာနိုင်ကြောင်း တွေ့ရှိရပါသည်။ လက္ခဏာရပ်အချို့မှာ-

–  ပါးစပ်ယားလာပြီး လျှာထူအမ်းလာခြင်း၊ လည်ချောင်း၊ မျက်လုံးရောင်ရမ်းလာခြင်း။

–  ခေါင်းမူးလာခြင်း။

–  အော့အန်ခြင်း၊ ဝမ်းလျှောခြင်း။

–  အသက်ရှူရ ခက်လာခြင်း။

–  လက်မောင်းနှင့် လည်ပင်းတွင် အင်ပြင် (အဖုအပိမ့်) ထလာခြင်း။

          အစာဓာတ်မတည့်ခြင်းသည် အားလုံးနှင့်သက်ဆိုင်သော အဓိပ္ပာယ်ဖွင့်ဆိုချက်မရှိဟု ဆေးသိပ္ပံပညာရှင်များက တင်ပြထားသည်ကို တွေ့ရှိရပါသည်။ ပညာရှင်အများစုသည် ကိုယ်ခံအားစနစ် (Immune System) ကြောင့် ဓာတ်မတည့်တုံ့ပြန်မှုမျိုး ဖြစ်လာသည်ဟု ယုံကြည်ကြသည်။ ဥပမာပြဆိုရလျှင် ကြယ်ပဲလှော် (Roasted Starbean, Sacha Inchi Nut) သည် အချို့စားသုံးသူများတွင် အဆင်ပြေမှုမရှိကြောင်း တွေ့ရှိရပါသည်။ အဆိုပါ ကြယ်ပဲတွင် ပါဝင်သော ပရိုတိန်းသည် အချို့သူများအတွက် ဓာတ်မတည့်မှုဖြစ်၍ အစာခြေဖျက်ရန် ခက်ခဲသူတို့တွင် ပို၍ဖြစ်လေ့ရှိပါသည်။ ကိုယ်ခံအားစနစ်က အဆိုပါ ပရိုတင်း ခန္ဓာကိုယ်တွင်းဝင်ရောက်လာသည့်အခါ (အန္တရာယ်ရှိသည်ဟု မှားယွင်းစွာ သတ်မှတ်ထားခြင်း) ရန်သူကို တိုက်ထုတ်ရန် Immunoglobulin E ဟု ခေါ်သည့် ဓာတ်ပစ္စည်း တစ်မျိုးကို ထုတ်လုပ်လိုက်ပါသည်။ ဝမ်းဗိုက်ထဲရောက်သွားသည့်အခါတွင် Histamine အပါအဝင် အခြားဓာတ်ပစ္စည်းများကိုလည်း ထပ်မံ၍ ထုတ်လုပ်ပါသည်။ သာမန်အခြေအနေမျိုးတွင် Histamine သည် ဝင်လာသည့် ပရိုတိန်းကို ရန်သူလို သတ်မှတ်ထားသည့်အတွက် တိုက်ထုတ်မှုပြုလုပ်သဖြင့် ဓာတ်မတည့်သည့် လက္ခဏာရပ်များ ပေါ်ထွက်လာပါသည်။ အဆိုပါဖြစ်စဉ်ကို ပညာရှင်များက ဖြေရှင်းရန် ကြိုးစားနေဆဲ ဖြစ်ပါသည်။ ပထမအကြိမ်စားစဉ်က မည်သည့်လက္ခဏာမျိုးမျှမပြသော်လည်း နောက်ထပ်တစ်ကြိမ် ထပ်မံစားလျှင် ဓာတ်မတည့်မှုများလည်း ဖြစ်ပေါ်လာနိုင်ပါသည်။

အစာတောက်ခြင်း (Food Intolerance)၊ အစာလက်ခံနိုင်မှုမရှိခြင်း

          အစာတစ်မျိုး (ဓာတ်မတည့်မှုနည်းတူ) စားခြင်းမှ ဖြစ်ပွားလာခြင်းဖြစ်ပါသည်။ သို့ရာတွင် အစာဓာတ်မတည့်ခြင်းသည် ကိုယ်ခံအားစနစ်၏ တုံ့ပြန်မှုကြောင့် ဖြစ်ပေါ်ပြီး အစာတောက်ခြင်းမှာ အစာခြေစနစ်၏ တုံ့ပြန်မှုကြောင့် ဖြစ်ပေါ်ခြင်းဖြစ်ပါသည်။ လူအချို့တွင် အစာခြေပေးနိုင်သော အင်ဇိုင်းဓာတ်လုံလောက်မှု မရှိသည့်အခါတွင် အစာတွင်း အစာခြေရန် ခက်ခဲသည့်  ဓာတုပစ္စည်းများ ပါဝင်လာသည့်အခါမျိုးတွင် ဖြစ်ပွားလေ့ရှိပါသည်။ ဥပမာအားဖြင့် နို့နှင့် နို့ထွက်ပစ္စည်းများတွင် ပါဝင်သည့် နို့သကြား (Lactose) ကို အူလမ်းကြောင်းအတွင်း ချေဖျက်ပေးနိုင်သည့် လိုအပ်သောအင်ဇိုင်း (Lactase) မထုတ်ပေးသောသူများသည် နွားနို့ကြောင့် အစာတောက်ခြင်း (Lactose Intolerance) ဖြစ်ပေါ်သည်ကို တွေ့ရှိရပါသည်။ သို့ဖြစ်ပါ၍ နို့သကြားနှင့် ဓာတ်မတည့်သော (နို့သောက်၍ မရသူများ) ကလေးသူငယ်အချို့အတွက် ပဲနို့ (Soy Milk) ကို အစားထိုးစားသုံးခြင်း ပြုလုပ်ပေးနိုင်ပါသည်။

          မိမိစားသုံးလိုက်သော ပမာဏပေါ်မူတည်၍ အစာတောက်မှုလက္ခဏာကို ပြသလေ့ရှိပါသည်။ အနည်းငယ်စားစဉ် မည်သို့မျှမဖြစ်သော်လည်း ပမာဏများလာပါက အစာတောက်မှု ဖြစ်လာနိုင်ပါသည်။ အစာဓာတ်မတည့်ခြင်းမှာ စားသောပမာဏနည်းသော် လည်း အသက်အန္တရာယ် ရှိနိုင်ပါသည်။ အခြေအနေဆိုးသော သတိလစ်ခြင်း၊ နှလုံးရပ်ခြင်းအထိ ဖြစ်လာနိုင်ပါသည်။ အသက်အရွယ်မရွေး ဖြစ်နိုင်သကဲ့သို့ မျိုးရိုးနှင့်လည်း သက်ဆိုင်ခြင်း (မိဘ၌ ဓာတ်မတည့်ပါက သားသမီးတွင်လည်း ဖြစ်လာနိုင်ခြင်း) ဖြစ်ပါသည်။

          အစာတောက်ခြင်းတွင် တွေ့ရသော လက္ခဏာများမှာ-

–  အစာအိမ်နာခြင်း။

–  ရောင်ရမ်းလာခြင်း။

–  လေပွခြင်း။

–  ကြွက်တက်ခြင်း။

–  ခေါင်းကိုက်ခြင်း။

–  အရေပြားယားယံခြင်း။

–  မောပန်းခြင်း။

–  မအီမသာဖြစ်ခြင်းတို့ ဖြစ်ပါသည်။

          အစာဓာတ်မတည့်ခြင်းလောက် စိုးရိမ်စရာ မရှိပါ။ နို့ထွက်ပစ္စည်း၊ ဂျုံ၊ ကောက်နှံ၊ အရက်၊ တဆေးများသည် အစာတောက်ခြင်းကို ဖြစ်စေပါသည်။

ရောဂါရှာဖွေခြင်းနှင့် ကုသခြင်း

          အစာဓာတ်မတည့်ခြင်း၊ အစာတောက်ခြင်းတစ်ခုခုဖြစ်ပွားနေလျှင် မတည့်သော အစာများကို ရှောင်ကြဉ်ခြင်းအပြင် ဆရာဝန်နှင့် တိုင်ပင်ဆွေးနွေးမှုပြုသင့်ပါသည်။

          ပြင်းထန်သော အစာဓာတ်မတည့်ခြင်းအတွက် ကုသနည်းအကောင်းဆုံးမှာ မိမိနှင့် ဓာတ်မတည့်မှု အစားအစာများကို မှတ်သားထားပြီး အထူးရှောင်ကြဉ်ရန် လိုအပ်ပါသည်။ သို့သော်လည်း အစာမတည့်ခြင်း၊ အစာတောက်ခြင်း အနည်းအကျဉ်းဖြစ်ပေါ်သူများသည် စားသည့်ပမာဏနှင့် စားသည့်အကြိမ်ကို လျှော့ချလိုက်ခြင်းအားဖြင့် အကျိုးရှိနိုင်ပါသည်။ အချို့သောသူများသည် အစာတောက်ခြင်း ပြင်းထန်တတ်ပါက အဆိုပါအစားကို အချိန်အတိုင်းအတာတစ်ခု (သို့) လုံးဝရှောင်ကြဉ်ဖို့ ပြုလုပ်ရမည်ဖြစ်ပါသည်။

          ပြင်းထန်သော အစာဓာတ်မတည့်ခြင်းကို “Anaphylaxis” ဟု ခေါ်ဆိုပါသည်။ အချိန်မီ မကုသနိုင်ခဲ့လျှင် သေဆုံးသည်အထိ ဖြစ်ပွားနိုင်ပါသည်။ အင်္ဂလန်နိုင်ငံတွင် တစ်နှစ်လျှင် လူ ၁၀ ဦးခန့် အစာဓာတ်မတည့်မှုကြောင့် သေဆုံးသည်ဟု မှတ်တမ်းများအရ သိရှိရပါသည်။

          ပြင်ပအစားအစာများကို စားသောက်သည့်အခါမျိုးတွင် သတိထားရှောင်ကြဉ်ရန် ပြုလုပ်ရမည့် အကြောင်းများမှာ-

၁။       စားသည့်အစာထုပ်ပိုးမှု တံဆိပ်ကပ်အညွှန်း (သို့) (Food Label နှင့် Menu) တွင် ပါဝင်ပစ္စည်းများကို ဖတ်ရှုပြီးမှ စားခြင်း။

၂။       စားသောက်ဆိုင်မှ ဝယ်ယူသည့် အစာများကို မှာကြားရာတွင် ဓာတ်မတည့်သည့် အစာများ ပါဝင်မှုမရှိစေရန် သေချာစွာညွှန်ကြား၍ မှာယူစားသုံးခြင်း ပြုလုပ်လေ့ရှိပါသည်။

ဓာတ်မတည့်မှုကို ထိန်းချုပ်ကာကွယ်ခြင်း

          ဓာတ်မတည့်မှုဖြစ်သောအရာများကို ထိန်းချုပ်ခြင်း မပြုလုပ်နိုင်ပါ။ ရေနှင့် ဆေးကြောခြင်း၊ စစ်ယူဖယ်ထုတ်ခြင်းနည်းကို အသုံးပြုခြင်းဖြင့် ဖယ်ထားခြင်းနှင့် အပူချိန် ဓာတုပစ္စည်းသုံး၍ ဖယ်ရှားခြင်းနည်းများကို အသုံးပြုပြီး ထိန်းချုပ်ကာကွယ်မှုမျိုး မပြုလုပ်နိုင်ပါ။

          ဝယ်ယူစားသုံးသော အစားအစာများတွင် ထည့်သွင်းအသုံးပြုထားသည့် ပါဝင်ပစ္စည်းများအနက် ဓာတ်မတည့်ပစ္စည်းများ ပါဝင်မှုရှိမရှိကို အထူးဂရုပြုပြီး ရှောင်ကြဉ်နေသော်ငြားလည်း တစ်ခါတစ်ရံတွင် မမျှော်လင့်သော ဓာတ်မတည့်မှုဖြစ်သော ပါဝင်ပစ္စည်းများ ပါလာတတ်သဖြင့် ဓာတ်မတည့်မှု ဖြစ်တတ်သူများအတွက် အထူးအရေးပါကြောင်း တင်ပြအပ်ပါသည်။

စီစီဝင်း (Food)

Facebook Comments