Cream Cheese Filled Kiwi Chocolate Cupcake (ခရင်ချိစ်ထည့် ကီဝီသီးချောကလက်ကပ်ကိတ်)

by Dexter’s Bistro for Food Magazine

            ချောကလက်ကိတ်က အီလို့ မစားချင်ကြတဲ့ သူတွေအတွက် အအီပြေအောင် ကီဝီသီးလေးနဲ့ ချဉ်ပြုံးလေး လုပ်ပေးလိုက်ပါတယ်။ ခရင်မ်ချိစ်ကို ဌာပနာထားတဲ့ ဒီချောကလက်ကပ်ကိတ်လေးက ကီဝီအရသာနဲ့ မအီမစိမ့်ဖြစ်စေမှာပါ။

လိုအပ်သောပစ္စည်းများ

ဂျုံမှုန့်ရိုးရိုး  –  ၁  ၁/၂ ခွက်

ဘေကင်ဆိုဒါပွဆေး  –  လက်ဖက်ရည်ဇွန်း ၁ ဇွန်း

ကိုကိုးပေါင်ဒါ  –  ၁/၄ ခွက်

ဆား  –  လက်ဖက်ရည်ဇွန်း ၁/၂ ဇွန်း

သကြားဖြူရိုးရိုး  –  ၁ ခွက်

ရေ  –  ၁ ခွက်

စားသုံးဆီ (ဟင်းရွက်ဆီ)  –  ၁/၃ ခွက်

ကြက်ဥအလုံးကြီး  –  ၁ လုံး (အခန်းအပူချိန်)

ဗင်နီကာအဖြူ (White Vinegar)  –  စားပွဲဇွန်း ၁ ဇွန်း

ဗနီလာအနံ့ရည်  –  လက်ဖက်ရည်ဇွန်း ၁ ဇွန်း

ခရင်မ်ချိစ် (Cream Cheese)  –  ၈ အောင်စ (အခန်းအပူချိန်)

ကီဝီသီးအချပ်  –  ၁၂ ချပ် (တစ်ဝက်အညီ ထက်ခြမ်းပိုင်းထားပါ)

ပြုလုပ်နည်း

၁။  အိုးတစ်အိုးမှာ ဂျုံမှုန့်ရိုးရိုး၊ ဘေကင်ဆိုဒါပွဆေး၊ ကိုကိုးပေါင်ဒါနှင့် ဆားတို့ကိုရောပြီး သမအောင် မွှေပေးပါ။

၂။  နောက်အိုးတစ်အိုးမှာ သကြားဖြူရိုးရိုး၊ ရေ၊ ဟင်းရွက်ဆီ၊ ကြက်ဥ၊ ဗင်နီကာအဖြူနှင့် ဗနီလာအနံ့ရည်တို့ကို ရောနှောပြီး ဇွန်းတစ်ချောင်းနဲ့ သမအောင် မွှေပေးပါ။

၃။  ဂျုံမှုန့်အရောအနှောကို သကြားဖြူအရောအနှောထဲ ဖြည်းဖြည်းချင်းလောင်းထည့်ပြီး ဇွန်းတံ (သို့) သစ်သားမွှေတံနဲ့ သမအောင် ရောနှောပေးပါ။ (Over Mix မလုပ်ရပါ။)

၎။  မုန့်နှစ်ရည်အရောအနှောကို ထောပတ်သုတ်ထားတဲ့ (သို့) ကပ်ကိတ်စက္ကူခွက် ခင်းထားတဲ့ Cupcake Pan ထဲက ကပ်ကိတ်ခွက်တွေထဲ တစ်ဝက်အနေအထား ပြည့်သည်အထိ ဖြည့်ပေးပါ။

၅။  ခရင်မ်ချိစ် စားပွဲဇွန်း ၁ ဇွန်းစီကို ကပ်ကိတ်ခွက်တိုင်းရဲ့ အလယ်ဗဟိုမှာ ထည့်ပေးပြီး ကျန်ရှိတဲ့ မုန့်နှစ်ရည်ကို ကပ်ကိတ်ခွက်တိုင်းရဲ့အပေါ်  အညီအမျှ ထည့်ပေးပါ။

၆။  ကီဝီသီး ၂ ခြမ်းစီကို ကပ်ကိတ်ခွက်တိုင်းရဲ့အပေါ်မှာ ထပ်ဆင့်တင်ပေးပါ။

၇။  အာဗင်ကို ၃၅၀˚F (၁၈၀˚C) ချိန်ကာ ကြိုအပူပေးပြီးလျှင် Cupcake Pan ကို ၁၆ မိနစ် (သို့) ၁၈ မိနစ်ခန့် ဖုတ်ပေးပါ။

၈။  တုတ်တံချောင်းသေးနဲ့ ကပ်ကိတ်အလယ်ကို ထိုးစိုက်ကြည့်ပြီး အထုတ်မှာ မုန့်သား ကပ်မပါလာလျှင် မုန့်ဗန်းကို အာဗင်ကထုတ်ကာ အအေးခံပြီး အဆင်သင့်စားသုံးနိုင်ပါပြီ။

Facebook Comments