ကြက်ဥအာလူးကြော် (Frittata)

by Meemeetofu for Food Magazine

          ကြက်ဥ၊ အာလူး နှစ်သက်သူတို့အတွက်ပါ။ ကြက်ဥနဲ့ အာလူးအပြင် ကိုယ်နှစ်သက်ရာ ကြက်ဥနဲ့လိုက်ဖက်တဲ့ မည်သည့်အသီးအရွက်ကိုမဆို သုံးနိုင်ပါတယ်။ ပြုလုပ်နည်းက အလွန်လွယ်ပါတယ်။ များသောအားဖြင့် သံကြွပ်ဒယ်အိုးအထူထဲ ပါဝင်ပစ္စည်းတွေ ထည့်ပြီး  အာဗင်ထဲမှာ ဖုတ်တာပါ။ မမီးက အများကြီးလည်း မလုပ်ချင်၊ အာဗင်လည်း မသုံးချင်၊ အာဗင်မရှိသူတွေလည်း လိုက်လုပ်လို့ရအောင် မကပ်တဲ့အိုး ခပ်သေးသေးကို သုံးပြီး မီးဖိုပေါ်မှာပဲ ချက်ပါတယ်။ ကိုယ်အသုံးပြုတဲ့အိုးက မီးအပူကို ဘယ်လောက်မြန်မြန် စုပ်ယူပြီး ဘယ်လောက်ကြာကြာ ထိန်းထားနိုင်သလဲဆိုတာ သိဖို့ အရေးကြီးပါတယ်။ အဲဒါဆို မီးကို ဘယ်အချိန်မှာပိတ်ရင် ကျန်အိုးအပူ၊ မီးအပူမှာ ကြက်ဥခဲနိုင်တယ်ဆိုတာ ခန့်မှန်းနိုင်ပါလိမ့်မယ်ရှင်။

ပါဝင်ပစ္စည်းများ

ကြက်ဥ  –  ၃ လုံး

အာလူး အလတ်  –  ၁ လုံး

Ham (ဝက်ပေါင်ခြောက်)  –  ၂ ပြား

မုန်လာဥနီ  –  ၁ လက်မ အရွယ်

ဗိုလ်စားပဲသီး  –  ၄ တောင့်

ကြက်သွန်မြိတ်   –  ၁ ပင်

ငရုတ်ကောင်း  –  အနည်းငယ်

ဆီ  –  စားပွဲဇွန်း တစ်ဝက်

ဆား  –  သင့်ရုံ

အရသာမှုန့်  –  သင့်ရုံ

ပြုလုပ်နည်းအဆင့်ဆင့်

၁။       အာလူးပြုတ်ပြီး နှစ်သက်ရာအရွယ် အတုံးလေးများ လှီးထားပါ။

၂။       ဟမ်ကို လေးထောင့် အတုံးသေးသေးလှီးထားပါ။

၃။       မုန်လာဥနီကို အကွင်းလှီးပြီး၊ အချောင်းရှည် ပြန်လှီးထားပါ။

၎။       ပဲသီးကို ရေဆူထဲ ထည့်ပြုတ်ပြီး အရောင်စိမ်းရင့်လာတာနဲ့ ဆယ်ယူကာ အအေးခံပြီး ပါးပါးလှီးထားပါ။

၅။       ကြက်ဥကို ခွက်တစ်ခုထဲမှာ ခေါက်ပါ။ ဆား၊ အရသာမှုန့်နဲ့ လှီးထားတာတွေ အကုန်ရောမွှေပါ၊

၆။       မကပ်သည့်အိုးထဲ ဆီအနည်းငယ်ထည့်ပါ။ မီးဖိုပေါ်တင်ပါ။ မီးကို အလယ်အလတ်မှာ ထားပါ။

၇။       ဆီပူမပူ ကြက်ဥရည်တစ်စက်ထည့်စမ်းပါ။ ကြက်ဥစက်လေး ချက်ချင်း အရောင်ပြောင်းသွားလျှင်  ရောဖျော်ထားတဲ့  ကြက်ဥရည်ထည့်ပါ။ အသားနဲ့ အသီးအရွက်များ ဒယ်အိုးအနှံ့ အညီအမျှရှိနေအောင် တူနဲ့ဖြန့်ပေးပါ၊

၈။       အဖုံးအုပ်ပြီး မီးမျှဉ်းမျှဉ်းနဲ့ ၂ မိနစ်ခန့် ထားပါ။ ဘေးသားများ ကျက်လာလျှင် မီးပိတ်လိုက်ပါ။ မီးအပူ ကျန်လေးနဲ့ ကြက်ဥခဲသွားပါလိမ့်မယ်။ ကြက်ဥအပေါ် မျက်နှာပြင်တင်းလာလျှင် ပန်းကန်ပြားကို အိုးပေါ် မှောက်ချပြီး အိုးကို ပန်းကန်ပြားပေါ် ဇောက်ထိုးထားလိုက်လျှင် ကြက်ဥကြော်  မှောက်လျက်လေး ထွက်လာပါလိမ့်မယ်။ ငရုတ်ကောင်းမှုန့် ဖြူးပြီး ကြက်သွန်မြိတ်ဖြူးကာ သုံးဆောင်နိုင်ပါပြီ။

Facebook Comments