ဝေဖြာစိမ်းစို ချက်စေလို

adipadi_4

adipadi_3

adipadi_2

ဝေဖြာစိမ်းစို ချက်စေလို

            ဇူလိုင်လမှာတော့ ဆရာမဒေါ်နန်းစန်းစန်းအေးက ‘ ပုစွန်ကင်ပွန်းချဉ်ရွက်ဆီပြန်’ အပါအဝင် ဟင်းလျာအတွဲ အစပ် (၇)မျိုးကို စီစဉ်ထားပါတယ်။ အဆိုပါ ဟင်းလျာအတွဲ အစပ်များကတော့ –

၁။        ငါးဂျဲချဉ်ပေါင်ခါးချက်၊ ကံ့ကူရံငါးခြောက်ငရုတ်သီးကြော်၊ ပဲပင်ပေါက်သုပ်၊ ကြက်သွန်ဖြူငရုတ်သီးစိမ်းထောင်း၊

၂။        တောင်ပို့မှို၊ ကဏန်းသားဆီပြန်၊ ကန်စွန်းရွက်ကြော်၊ ငါးပိချက်၊ မုန်ညင်းဟင်းရည်၊

၃။        ဝက်သုံးထပ်သားကြော်၊ ငုံးဥအာလူးချဉ်ရည်၊ ကိုက်လန်ရွက်သုပ်၊ ပုစွန်ငါးပိထောင်း၊

၎။        ကြက်သားမဆလာအစပ်ချက်၊ မန်ကျည်းရွက်ချဉ် ဟင်းရည်၊ မုန်လာဥသုပ်၊ ဂျူးမြစ်မြေပဲငါးပိကြော်၊

၅။        အမဲသားပြုတ်ကြော်၊ ရွှေဖရုံသီးနှပ်၊ သရက်သီးငါးပိကြော်၊ ပူစီနံသခွားသီးဖိသုပ်၊

၆။        ဖားသားဆီပြန်၊ ဘူးသီးဘူးညွှန့်ဟင်းရည်၊ မန်ကျည်းရွက်သုပ်၊ ငံပြာရည်ဖျော်၊ အတို့စုံ၊

၇။        ပုစွန်ကင်ပွန်းချဉ်ရွက်ဆီပြန်၊ ပဲကြီးနှပ်၊ ဆူးပုပ်ရွက်ဟင်းချို၊ ငရုတ်သီးသုပ်၊ ငါးပိချက်၊။

            အဆိုပါ ဟင်းလျာအတွဲ အစပ် (၇)မျိုးထဲမှ ပုစွန်ကင်ပွန်းချဉ်ရွက်ဆီပြန်၊ ပဲကြီးနှပ်၊ ဆူးပုပ်ရွက်ဟင်းချို၊ ငရုတ်သီးသုပ်၊ ငါးပိချက်တို့ကို တင်ဆက်ပေးလိုက်ပါတယ်။

            ‘မတွေ့တာ တစ်လလောက်ရှိပြီလားလို့’

            ‘ရက်နှစ်ဆယ်ကျော်ပါဟယ်။ မေမြို့ကို ခဏသွားတာ’

            ‘အပူသွားရှောင်တာပေါ့။ ကောင်းလိုက်တာ၊ ရာသီဥတုအခြေအနေ ဘယ်လိုနေလဲ’

            ‘မေမြို့ဆိုကာမှပဲ ရန်ကုန်လောက်ဘယ်ပူမှာလဲ၊ အရင်လိုအေးစိမ့်မနေပေမယ့် နေလို့ကောင်းတယ်။ အေး အေးချမ်းချမ်းနဲ့ ပန်းရနံ့မွှေးမွှေးလေးပေါ့’

            ‘အားကျလိုက်တာ ဒီမှာ ခရမ်းလွန်ရောင်ခြည် အညွှန်းကိန်းက ၁ဝ.၈၊ အပူချိန်က ၄၃ ဒီဂရီစင်တီဂရိတ်ဆိုတော့ နေရထိုင်ရ အတော်လေးကို မသက်သာဘူး’

            ‘ဟုတ်တယ် လူချင်းအတူတူကို နေရာလေးလွဲတာနဲ့ပဲ ပူတာအေးတာ တော်တော်ကွာခြားနေတယ်။ ရန်ကုန်မှာ မိုးရွာတယ်ဆိုလို့သာ ပြန်လာတာ’

            ‘ဟုတ်တယ်နော်၊ တို့မြန်မာပြည်ထက်ပိုပြီးပူတဲ့ နိုင်ငံတွေအများကြီးရှိသေးတယ်။ အပူဆုံးက လစ်ဗျားနိုင်ငံ၊ အပူချိန် ၅၅ ဒီဂရီစင်တီဂရိတ်ဖြစ်ပြီး ကျန်တဲ့ ဆော်ဒီအာရေဗျ၊ အီရတ်၊ အယ်ဂျီးနီးယား၊ အီရန်၊ အိုမန်၊ ဆူဒန်၊ ဆိုမာလီယာ၊ အိန္ဒိယ၊ မက္ကဆီကိုနိုင်ငံတွေရဲ့ အပူချိန်က ပျမ်းမျှက ၅၃.၅၄ ဒီဂရီစင်တီဂရိတ်ကြားတွေမှာရှိပြီး အနိမ့်ဆုံးဆို ၄၈.၄၅ ဒီဂရီစင်တီဂရိတ်ထိ ရှိတယ်တဲ့’။

            ‘တို့မြန်မာပြည်နဲ့ သိပ်မကွာတော့သလိုပဲ နွေမှာ မကွေးမြို့၊ ချောက်မြို့တို့မှာလည်း ၄၅ ဒီဂရီစင်တီဂရိတ်ထိ ရှိတာပဲ’။

            ‘ဟုတ်တယ်လေ။ အပူဆုံးဆိုတဲ့ သဲကန္တာရ ထူထပ်များပြားပြီး သစ်တော ဧရိယာမရှိတဲ့နိုင်ငံတွေနဲ့ကို နင်လား ငါလား အပူပြိုင်နိုင်နေပြီ။’

            ‘ဂုဏ်ယူစရာပဲ၊ တို့နိုင်ငံမှာရော သစ်တောဧရိယာ ဘယ်လောက်ရှိတော့လို့လဲ’

            ‘၂ဝ % လောက်ရှိသေးတယ်လို့ ကြားတာပဲ’

            ‘ရှိတယ်လို့သာပြောတာ တို့မြို့ရဲ့ နောက်ကပဲခူးရိုးမကြီးမှာ ဝါးပင်လေး ကျိုးတိုးကျဲတဲနဲ့ တောင်ကတုံးတွေကြီး တွေ့ရတယ်’

            ‘အဲလိုဖြစ်နေရင် တို့မှာတာဝန်ရှိတယ်။ အဲဒီတောင် ကတုံးတွေ ယောင်ထုံး ထုံးနိုင်အောင် အပင်တွေစိုက်ရမှာပေါ့’

            ‘မှန်တယ် သူငယ်ချင်း လုပ်ကိုလုပ်ရမဲ့အလုပ်ပဲ။ အခုတော့ နေ့စဉ်လုပ်ရတဲ့ အလုပ်တစ်ခုထဲက အိမ်သား တွေစားဖို့ ချက်ကြရအောင် . . . ‘

            ပုစွန်ကျားကင်ပွန်းချဉ်ရွက်ဆီပြန်၊ ပဲကြီးနှပ်၊ ဆူးပုပ်ရွက်ဟင်းချို၊ ငရုတ်သီးသုပ်၊ ငါးပိချက်တို့စရာအတွဲပါ။

            ခေါင်းမပါ ပုစွန်ကျားဆယ့်ငါးကျပ်သား၊ အခွံနွှာ ချေးကြောင်းထုတ်ပြီး ရေစင်စင်ဆေးမယ်။ ဆား လက်ဖက်ရည်ဇွန်းတစ်ဝက်၊ အရသာမှုန့် ဇွန်းရဲ့ သုံးပုံတစ်ပုံနဲ့ ရောနယ်ထားမယ်။

            ချက်မည့်အိုးထဲ ဆီငါးကျပ်သားနဲ့ ကြက်သွန်ဖြူတစ်ဥ၊ ကြက်သွန်နီတစ်ဥ၊ ငရုတ်ပွသုံးတောင့် ရောထောင်းတွေ ထည့်ကြော်မယ်။ ကြက်သွန်ဖတ်တွေ ဆီပေါ်ပေါ် ပြီး အနံ့မွှေးလာရင် ခရမ်းချဉ်သီးနှစ်လုံးကြိတ်ထားတာ ထပ်ထည့်မယ်။ ခရမ်းချဉ်သီးထဲပါတဲ့ အရည်ခန်းရင် ပုစွန်နဲ့အတူ ကင်ပွန်းချဉ်ရွက်အနုတစ်စည်းစာပါ ရောထည့်မယ်။ တစ်ဆက်တည်း ငံပြာရည် စတီးဇွန်းတစ်ဇွန်းနဲ့အတူ အစပ်ကြိုက်ရင် ငရုတ်သီးမှည့် ငါးတောင့်နုပ်နုပ်စဉ်းထားတာ ထည့်မယ်။ ပွက်ဆူပြီး ပုစွန်တွေ ကွေးသွားရင် အရသာ ကိုယ့်အကြိုက်ဖြစ်အောင် မြည်းပြီးရင် အိုးချလို့ရပါပြီ။

            ပဲကြီးနှပ်အတွက် ပဲတစ်ဆယ်သား နူးအောင်ပြုတ်၊ ကြက်သွန်ဖြူနီ ဆီသတ်ပြီး နနွင်းအနည်းငယ်ခပ် အစေ့မပျက်အောင် မီးအေးနဲ့ နှပ်ရုံပါပဲ။ ဆားအရသာကတော့ သင့်ရုံမြည်းပြီး ထည့်ပါမယ်။ ကြက်သွန်နီကြော်လေး အပေါ်ကဖြူးပြီး ဆီများများနဲ့ဆို စားမကောင်းမှာ မပူရပါဘူး။

            ဆူးပုပ်ဟင်းချိုအတွက် ရေတစ်လီတာထဲ ကြက်ရိုးလေးငါးချောင်းပြုတ်ထားတဲ့ အရိုးပြုတ်ရည် ကြက်သွန်ဖြူ သုံးလေးတက် ဓားပြားရိုက်ထည့်၊ ပြုတ်ရည် သုံးပုံတစ်ပုံ ခန်းရင် ဆူးပုပ်ရွက်နုလေးတွေ ရေနွေးဖျော်အပြီး၊ စားခါနီးခပ်လိုက်ရင် ဟင်းရည်သောက်ရပါပြီ။ များများချိုတာ ကြိုက်ရင် ပုစွန်အကောင်ကြီးကြီး၊ ငါးမီးကင်တွေ ထပ်ဖြည့်လို့ရပါသေးတယ်။ ဆားလေး အနေတော်ခတ်ရုံနဲ့တင် သဘာဝအချိုနဲ့ လုံလောက်ပါတယ်။

            ငရုတ်သီးသုပ်အတွက် ငရုတ်သီးကြော် ၁ဝ တောင့် ညက်အောင်ထောင်း၊ ကြက်သွန်နီပါးပါးလှီးတစ်ခု၊ ကြက်သွန်ဖြူသုံးတက်၊ မညက်တညက်ထောင်း၊ မြေပဲလှော် မှုန့် လက်ဖက်ရည်ဇွန်းတစ်ဇွန်း၊ ဆား၊ ဆီသင့်ရုံထည့်ပြီး နယ်တာပါပဲ။ အလွယ်တကူ လုပ်လို့ရပါတယ်။

            ငါးပိချက်အတွက် အဆင်ပြေရာ ငါးတစ်ကောင် (သို့) တစ်တုံးနဲ့ ကြက်သွန်ဖြူ သုံးတက်၊ ခရမ်းချဉ်သီး တစ်လုံး၊ ငရုတ်သီးစပ်သလောက် အားလုံးရောထားတာနဲ့ လုံးပါမယ်။ ကျက်သွားရင် ရေချိုငါးပိတစ်ခွက်စာ လောင်း ထည့်ပြီး ပွက်ဆူအောင်တည်၊ နံနံပင်၊ ကြက်သွန်မြိတ်၊ အဆင်ပြေရာနဲ့ခပ်လိုက်ရင် ငါးငါးပိချက်ရပါပြီ။ ကြိုက်နှစ်သက်ရာ တို့စရာတွေနဲ့ စားဖို့ပါပဲ။

            ဒီလိုနေ့စဉ် မစားမဖြစ် ဟင်းတွေ ချက်ပြုတ်ရသလိုပဲ လူတွေ အသက်ရှုဖို့ အောက်ဆီဂျင်၊ ရာသီဥတုသမမျှတ အောင် လုပ်ပေးနေတဲ့ သစ်ပင်စိမ်းစိမ်းစိုစိုတွေကိုလည်း မစိုက်မဖြစ် စိုက်ကြရာမှာကတော့ ကမ္ဘာသူကမ္ဘာသား အားလုံးမှာ တာဝန်ရှိနေပါတယ်။ လာမဲ့ မိုးတွေနဲ့အတူ သစ်ပင်တွေ ဝေဖြာစိမ်းစိုအောင် စိုက်ကြပါစို့။

►   ကင်ပွန်းချဉ်ရွက်ဆီပြန်

♦   ပုစွန်ကျား   –   ၁၅ ကျပ်သား

♦   ဆား   –   လက်ဖက်ရည်ဇွန်းတစ်ဝက်

♦   အရသာမှုန့်   –   အနည်းငယ်

♦   ဆီ   –   ၅ ကျပ်သား

♦   ကြက်သွန်ဖြူ   –   ၁ ဥ

♦   ကြက်သွန်နီ   –   ၁ ဥ

♦   ငရုတ်ပွ   –   ၃ တောင့်

♦   ခရမ်းချဉ်သီး   –   ၂ လုံး

♦   ကင်ပွန်းချဉ်ရွက်   –   ၁ စည်း (အနု)

♦   ငံပြာရည်   –   စတီးဇွန်း ၁ ဇွန်း

♦   ငရုတ်သီးမှည့်   –   ၅ တောင့်

►   ပဲကြီးနှပ်

♦   ပဲကြီး   –   ၁ဝ သား

♦   ကြက်သွန်ဖြူ

♦  ကြက်သွန်နီ

♦   နနွင်း

♦   ဆား

♦   ဆီ

►   ငရုတ်သီးသုပ်

♦   ငရုတ်သီးကြော်   –   ၁ဝ တောင့်

♦   ကြက်သွန်နီ   –   ၁ ဥ

♦   ကြက်သွန်ဖြူ   –   ၃ တက်

♦   မြေပဲလှော်မှုန့်   –   လက်ဖက်ရည်ဇွန်း ၁ ဇွန်း

♦   ဆား   –   အနည်းငယ်

♦   ဆီ   –   သင့်ရုံ

♦  ဒေါ်နန်းစန်းစန်းအေး (အဓိပတိ – ဖြူး)   ♦

Facebook Comments