တောက်တောက်စဉ်းဝက်သားခရမ်းချဉ်သီးချက် ထမင်းသုပ် (Ground Pork with Tomato Curry with Rice Salad)

by Syi Lwin Foods Garden for Food Magazine

          နေ့စဉ် ဟင်း၊ ထမင်းနဲ့ စားနေရတာ တစ်ခါတလေ ငြီးငွေ့လာတဲ့အခါ  အခုလို တောက်တောက်စဉ်းအသားကို ထမင်းနဲ့ ချဉ်စပ်သုပ်စားရတာက ထမင်းစားမကောင်းတဲ့ အခါမျိုးတွေဆိုရင် အရမ်းအဆင်ပြေစေပါတယ်။ လုပ်စားကြည့်နော်။

ပါဝင်ပစ္စည်းများ

အသားနယ်နှပ်ရန် အုပ်စု (က)

ဝက်သား  –  ၃၀ ကျပ်သား (တောက်တောက်စဉ်း)

ဆား  –  လက်ဖက်ရည်ဇွန်း ၁  ၁/၂ ဇွန်း

ချင်း  –  လက်ဖက်ရည်ဇွန်း ၁ ဇွန်း (ညက်အောင်ထောင်းထားပါ)

ကြက်သွန်ဖြူ  –  ၂ မြွှာ (ညက်အောင်ထောင်းထားပါ)

နနွင်းမှုန့်  –  အနည်းငယ်

အနှစ်လုပ်ရန် အုပ်စု (ခ)

ငရုတ်သီးခွဲကြမ်းဖတ်  –  စားပွဲဇွန်း  ၁  ၁/၂ ဇွန်း

အသီးအရွက်ဆီ  –  စားပွဲဇွန်း  ၈၊ ၉ ဇွန်း

ငံပြာရည်  –  စားပွဲဇွန်း ၁ ဇွန်း  (လိုလျှင် ထပ်ထည့်ပါ)

ကြက်သွန်နီ  –  ၃ လုံး (ထောင်းထားပါ)

ကြက်သွန်ဖြူ  –  ၄ မြွှာ (ထောင်းထားပါ)

နနွင်းမှုန့်  –  လက်ဖက်ရည်ဇွန်း ၁/၂ ဇွန်း

ခရမ်းချဉ်သီး  –  ၃ လုံး (ပါးပါးလှီးထားပါ)

အသုပ်သုပ်ရန် (အုပ်စု ဂ) ၂ ယောက်စာ သုပ်ရန်

ထမင်း  –  ၂ ခွက်

ခရမ်းချဉ်သီး  –  ၂ လုံး (ပါးပါးအရှည်များ လှီးထားပါ)

နံနံပင်  –  ၃ ပင် (အရွက်များ ခြွေထားပါ)

ပူဒီနာ  –  ၂ ပင် (အရွက်များ ခြွေထားပါ)

ကြက်သွန်နီကြော်  –  စားပွဲဇွန်း ၁ ဇွန်း

ဂေါ်ဖီ  –  ၁ ခွက် (ခပ်ပါးပါးလှီးထားပါ)

ငံပြာရည်  –  အနည်းငယ်

ဆား  –  အနည်းငယ်

သံပရာသီး  –  ၁၊ ၂  လုံး (အရည်ညှစ်ယူပါ)

ပြုလုပ်နည်း

၁။       ဖန်ဇလုံကြီးထဲ အုပ်စု (က) မှ ပါဝင်သော ပစ္စည်းများအားလုံး ထည့်ပြီး နယ်ပါ။

၂။       အကြော်အိုးထဲ ဆီထည့်ပါ။ ဆီပူလာလျှင် အုပ်စု (ခ)မှ ကြက်သွန်နီ၊ ကြက်သွန်ဖြူနှင့် နနွင်းမှုန့်တို့ကို ဆီသတ်ပါ။ နွမ်းလာလျှင် အုပ်စု (ခ)မှ ကျန်ပါဝင်ပစ္စည်းများထည့်ပြီး နှံ့အောင် မွှေပါ။

၃။       အားလုံးမွှေပြီး  ရွှေရောင်သန်းလာလျှင် နယ်နှပ်ထားသော အသားများကို ထည့်ပါ။

၎။       နှံ့အောင် မွှေပါ။ အသားကျက်လျှင် ဆားမြည်းပြီး လိုတာထပ်ဖြည့်နိုင်ပါတယ်။

၅။       ဖန်ဇလုံကြီးထဲ ၂ ယောက်စာ အုပ်စု (ဂ)မှ ပါဝင်ပစ္စည်းများထည့်ပါ။ ပြီးလျှင် ဝက်သားအနှစ်ကို လိုသလောက် စားပွဲဇွန်း ၄၊ ၅ ဇွန်းခန့် ထည့်ပြီး လက်ဖြင့် သေချာနယ်ပါ။ ဆားမြည်းပြီး လိုတာ ထပ်ဖြည့်ပါ။  ထမင်းသုပ်ကို  ပဲဟင်းချိုနဲ့ တွဲစားမည်ဆိုလျှင် အလွန်လိုက်ဖက်ပါတယ်။

*        မှတ်ချက် – မြေပဲကြော်၊ အာလူးကြော်၊ သံပရာသီး၊ ပူဒီနာတို့ဖြင့် တွဲစားလည်း ရပါတယ်။

Facebook Comments