အိုမီဂါ ဖက်တီးအက်ဆစ်များ (Omega Fatty Acids)

by ဒေါက်တာလှကြည် for Food Magazine

          အိုမီဂါ-၃ (Omega-3)၊ အိုမီဂါ-၆ (Omega-6) နှင့် အိုမီဂါ-၉ (Omega-9) စတဲ့ အိုမီဂါဖက်တီးအက်ဆစ်တွေဟာ လူကို တစ်မျိုးစီ အကျိုးပြုကြပါတယ်။ အိုမီဂါ ဖက်တီးအက်ဆစ်တွေအကြောင်း နားလည်ဖို့ အဆီအမျိုးမျိုးနှင့် ဖက်တီးအက်ဆစ်အမျိုးမျိုး အကြောင်းကို သိထားသင့်ပါတယ်။

အဆီအမျိုးမျိုး

          အမဲဆီ၊ ၀က်ဆီ၊ မလိုင်၊ ထောပတ်စတဲ့ တိရစ်္ဆာန် ထွက် အဆီတွေနှင့် အပင်ထွက် ဆီတစ်မျိုးဖြစ်တဲ့ အုန်းဆီ (Coconut Oil) ဟာ “ပြည့်ဝဆီ” အဆီခဲတွေ ဖြစ်ပါတယ်။ မြေပဲဆီ၊ နှမ်းဆီ၊ ပဲပုပ်ဆီစတဲ့ အပင်ထွက်ဆီတွေကတော့ “မပြည့်ဝဆီ” ဆီရည်ကြည်တွေ ဖြစ်ပါတယ်။ ပြည့်ဝဆီ စားသုံးမှုများလျှင် သွေးအတွင်းမှာ ကိုလက်စထရော (Cholesterol) ပမာဏ မြင့်တက်လာပြီး နှလုံးသွေးကြော ရောဂါတွေ ဖြစ်နိုင်တဲ့ အလားအလာများပါတယ်။ ပြည့်ဝ ဆီတွေနေရာမှာ မပြည့်ဝဆီတွေကို အစားထိုးပြီး စားသုံးခြင်းက  ကျန်းမာရေးအတွက် အကျိုးရှိတယ်ဆိုတဲ့ အထောက်အထားတွေရှိပါတယ်။

ဖက်တီးအက်ဆစ်များ (Fatty Acids)

          ပြည့်ဝဆီဖြစ်စေ၊ မပြည့်ဝဆီဖြစ်စေ အားလုံးမှာ ပြည့်ဝတဲ့ ဖက်တီးအက်ဆစ် (Saturated Fatty Acid) တွေနှင့် မပြည့်ဝတဲ့ ဖက်တီးအက်ဆစ် (Unsaturated Fatty Acid) တွေ နှစ်မျိုးစလုံး ပေါင်းစပ်ပါဝင်နေပါတယ်။ ပြည့်ဝတဲ့ဖက်တီးအက်ဆစ်တွေက အချိုးအဆပိုများတဲ့ အဆီမျိုးကို ပြည့်ဝဆီလို့သတ်မှတ်ပြီး မပြည့်ဝတဲ့ ဖက်တီးအက်ဆစ်တွေ အချိုးအဆပိုများတဲ့ အဆီမျိုးကို မပြည့်ဝဆီလို့ သတ်မှတ်ခြင်းဖြစ်ပါတယ်။

          ဖက်တီးအက်ဆစ်မော်လီကျူးတွေမှာ ဟိုက်ဒရိုဂျင် အလုံးရေဟာ ကာဗွန်အလုံးရေရဲ့ နှစ်ဆလောက်ရှိပါတယ်။ စုစုပေါင်း ကာဗွန် ၁၂ လုံးရှိလျှင် ဟိုက်ဒရိုဂျင် ၂၄ လုံး၊ ကာဗွန် ၁၄ လုံးရှိလျှင် ဟိုက်ဒရိုဂျင်၂၈ လုံး စသဖြင့် ကာဗွန် တစ်လုံးအတွက် ဟိုက်ဒရိုဂျင် နှစ်လုံးနှုန်း အပြည့်အ၀ ပါဝင်နေတဲ့ ဖက်တီးအက်ဆစ်တွေကို ပြည့်ဝတဲ့ ဖက်တီးအက်ဆစ်တွေလို့ သတ်မှတ်ပါတယ်။ ကာဗွန် ၁၈ လုံး၊ အလုံး ၂၀၊ ၂၂ လုံး စသဖြင့် အလုံးရေ များပြားတဲ့ ဖက်တီး အက်ဆစ်အချို့မှာတော့ ဟိုက်ဒရိုဂျင်အလုံးရေဟာ ကာဗွန်အလုံးရေရဲ့ နှစ်ဆမပြည့်ပါဘူး။ အဲဒီလို ဖက်တီးအက်ဆစ်မျိုးတွေကို မပြည့်ဝတဲ့ ဖက်တီးအက်ဆစ်တွေလို့ ခေါ်ခြင်းဖြစ်ပါတယ်။

အိုမီဂါ-၃ ဖက်တီးအက်ဆစ်များ (Omega-3 Fatty Acids)

          ကာဗွန်နှင့် ဟိုက်ဒရိုဂျင်အက်တမ်တွေ ပုလဲပုတီးလို အတန်းလိုက် ချိတ်ဆက်နေတဲ့ ဖက်တီးအက်ဆစ် မော်လီကျူးကို အဖျား (အမြီး)ပိုင်းနှင့် အရင်း (ခေါင်း)ပိုင်းလို့ သတ်မှတ်လိုက်ပြီး အဖျားပိုင်းကို “အိုမီဂါ” လို့ နာမည်ပေးတဲ့ စနစ်တစ်ခုရှိပါတယ်။ အဖျား (အိုမီဂါ)ပိုင်း အစွန်ဆုံးကာဗွန်ကို နံပါတ် (၁) လို့ သတ်မှတ်ပြီး အရင်းဘက်ကို အစဉ်လိုက်ရေတွက်လာလိုက်တာ နံပါတ် (၃) ကာဗွန်ဟာ ဟိုက်ဒရိုဂျင် အပြည့်အ၀ ချိတ်ဆက်မနေဘူးဆိုလျှင် အဲဒီဖက်တီးအက်ဆစ်မျိုးကို အိုမီဂါ-၃ ဖက်တီး အက်ဆစ်လို့ ခေါ်ပါတယ်။ အိုမီဂါ-၃ ဖက်တီးအက်ဆစ်တွေမှာ နံပါတ် (၃) ကာဗွန်သာမက အခြားကာဗွန်အချို့ဟာလည်း ဟိုက်ဒရိုဂျင်မပြည့်မ၀ ချိတ်ဆက်နေရတတ်ပါတယ်။ ဒါကြောင့် အိုမီဂါ-၃ ဖက်တီးအက်ဆစ်တွေဟာ တစ်နေရာမက မပြည့်ဝတဲ့ ပေါ်လီမပြည့်ဝ ဖက်တီးအက်ဆစ် (Poly- Unsaturated Fatty Acid) တွေ ဖြစ်ပါတယ်။

အိုမီဂါ-၃ ဖက်တီးအက်ဆစ်ပါဝင်သည့် အစားအစာများ

          နှမ်းကြတ်စေ့ (Flax Seed) နှင့် နှမ်းကြတ်ဆီ (Flax Seed Oil) တို့ဟာ အိုမီဂါ-၃ ဖက်တီးအက်ဆစ်ကြွယ်ဝတဲ့ အပင်ထွက်အစားအစာတစ်မျိုး ဖြစ်ပါတယ်။ ဖရုံစေ့နှင့် သစ်ကြားစေ့မှာလည်း အိုမီဂါ-၃ ဖက်တီးအက်ဆစ် အတော်များများပါဝင်ပါတယ်။ အဆန်အစေ့တွေ၊ ကိုက်လန်၊ ပန်းဂေါ်ဖီစိမ်း၊ ဆလတ်ရွက် စတဲ့ အပင်ထွက် အစားအစာတွေမှာ ပါဝင်နေတဲ့ အိုမီဂါ-၃ ဖက်တီး အက်ဆစ်ရဲ့ အမည်က Alphalinolenic Acid ဖြစ်ပါတယ်။ ALA လို့ အတိုကောက်ပြောလေ့ရှိပါတယ်။ လူ့ခန္ဓာကိုယ်ဟာ မိမိလိုချင်တဲ့ ဖက်တီးအက်ဆစ် အများအပြားကို ရရှိဖို့ ဖက်တီးအက်ဆစ်တွေ အချင်းချင်း ပြောင်းလဲဖန်တီး ယူနိုင်စွမ်းရှိပါတယ်။ ALA ကိုတော့ အခြားဖက်တီးအက်ဆစ်တွေကနေ ပြောင်းလဲဖန်တီးယူလို့ မရပါဘူး။ ALA ကို အစားအသောက်ထဲမှာပါအောင် စားသုံးမှသာ ရနိုင်ပါတယ်။ ဒါကြောင့် ALA ဟာ အစားအသောက်ထဲမှာ မဖြစ်မနေပါအောင် စားသုံးရမယ့် ဖက်တီးအက်ဆစ် (Essential Fatty Acid) တစ်မျိုးဖြစ်ပါတယ်။

          အေးမြတဲ့ ပင်လယ်ရေနက်ပိုင်းမှာ  ကျက်စားတဲ့ ဆာဒင်း (Sardine)၊ တူနာ (Tuna)၊ ဆယ်လ်မွန် (Salmon) စတဲ့ ငါးတွေဟာ အိုမီဂါ-၃ ဖက်တီးအက်ဆစ်ကြွယ်ဝပါတယ်။ ဒီငါးတွေရဲ့အဆီမှာ ပါဝင်နေတဲ့ အိုမီဂါ-၃ ဖက်တီး အက်ဆစ်နှစ်မျိုးရဲ့ အမည်တွေက Eicosapentanoic Acid  နှင့် Docosahexanoic Acid တို့ ဖြစ်ပါတယ်။ EPA နှင့် DHA လို့ အတိုကောက် ပြောလေ့ရှိပါတယ်။

ပင်လယ်ငါးတွေထဲက အိုမီဂါ-၃ ဖက်တီး အက်ဆစ်တွေ အကျိုးပြုပုံ

          ပင်လယ်ငါးတွေထဲက အိုမီဂါ-၃ ဖက်တီးအက်ဆစ် EPA ဟာ လူ့ခန္ဓာကိုယ်ထဲမှာ Eicosanoid ဆိုတဲ့ ဓာတ်ပေါင်းတွေဖြစ်လာပြီး ရောင်ရမ်းမှု (Inflammation) ကို လျော့နည်း သက်သာစေနိုင်စွမ်း ရှိပါတယ်။ နာတာရှည် အဆစ်ရောင်ရောဂါတွေမှာ အဆစ်ရဲ့ ပတ်ပတ်လည် ရောင်ရမ်းခြင်း၊ ပန်းနာရင်ကျပ်ရောဂါမှာ အသက်ရှူ လေပြွန်တွေ ရောင်ရမ်းခြင်း၊ သွေးကြောကျဉ်းရောဂါတွေမှာ သွေးကြောနံရံတွေ ရောင်ရမ်းခြင်းတို့ကို သက်သာစေတယ် လို့ပြောခြင်းဖြစ်ပါတယ်။ အိုမီဂါ-၃ ဖက်တီးအက်ဆစ် EPA က ရောင်ရမ်းမှုနှင့် ဆက်စပ်နေတဲ့ နာတာရှည် ရောဂါတွေမဖြစ်အောင်၊ သက်သာအောင်၊ ကာကွယ်ပေးနိုင်တယ်လို့ မှတ်ထားနိုင်ပါတယ်။

          အိုမီဂါ-၃ ဖက်တီးအက်ဆစ် နောက်တစ်မျိုးဖြစ်တဲ့ DHA ဟာ လူရဲ့ ဦးနှောက်ထဲမှာ အများဆုံး ရှိနေပါတယ်။ ဦးနှောက်ရဲ့ အလေးချိန် ၈% လောက်ဟာ DHA တွေ ဖြစ်ပါတယ်။ လူ့ဦးနှောက်  အထူးသဖြင့် လသားအရွယ်နှင့် ငါးနှစ်အောက်ကလေးတွေရဲ့  ဦးနှောက်ဖွံ့ ဖြိုးမှုအတွက် DHA ဟာ အရေးကြီးပါတယ်။ သက်ကြီးရွယ်အိုဘ၀မှာ ဦးနှောက်လုပ်ငန်းတွေ ပျက်ယွင်းနှေးကွေးလာတဲ့ အခြေအနေမျိုး (Dementia) နှင့် မှတ်ဥာဏ် အားနည်းလာတဲ့ အခြေအနေမျိုးကိုလည်း DHA က သက်သာစေနိုင်ပါတယ်။

အပင်ထွက် အစားအစာများထဲမှ အိုမီဂါ-၃ ဖက်တီးအက်ဆစ်များ အကျိုးပြုပုံ

          အပင်ထွက် အစားအစာတွေထဲက အိုမီဂါ-၃ ဖက်တီးအက်ဆစ် ALA ကို ပင်လယ်ငါးတွေထဲက အိုမီဂါ-၃ EPA ဖြစ်လာအောင် ပြောင်းပြီးသုံးလို့ရပါတယ်။ ဒါပေမဲ့ လူ့ခန်္ဓာ ကိုယ်ထဲမှာ ဒီလိုပြောင်းတဲ့ လုပ်ငန်းစဉ်က မမြန်ဆန်၊ မထက်မြက်တဲ့အတွက် ALA ကို ရိုးရိုး ဖက်တီးအက်ဆစ်တွေလိုပဲ အင်အား (ကယ်လိုရီ) ထုတ်လုပ်ဖို့သာ သုံးလိုက်ရတာများပါတယ်။ EPA ရရှိဖို့ ဆိုရင် ALA ကို လူ့ခန္ဓာကိုယ်ထဲမှာ EPA ဖြစ်အောင် ပြောင်းယူမယ့်အစား EPA အဆင်သင့်ပါဝင်နေတဲ့ ပင်လယ်ငါးတွေကို စားတာက ပိုပြီးသေချာပါတယ်။ ပင်လယ်ငါး အဆီဆေးလုံးတွေ မှီဝဲခြင်းအားဖြင့်လည်း EPA ကို ရနိုင်ပါတယ်။

          အိုမီဂါ-၃ ဖက်တီးအက်ဆစ်တွေကို စားသုံးခြင်းက သွေးထဲမှာ ကျန်းမာရေးကို အကျိုးပြုတဲ့ HDL ကိုလက်စထရောတွေ ပိုများစေနိုင်ပါတယ်။ သွေးထဲမှာ ကျန်းမာရေးအတွက် မကောင်းတဲ့ ထရိုင်ဂလစ်စရိုက် (Triglyceride) အဆီနည်းစေပါတယ်။ သွေးပေါင်ချိန်ကို လျော့ကျစေပါတယ်။ သွေးကြောတွေရဲ့နံရံမှာ အဆီဖတ်တွေဖြစ်မလာ အောင်လည်း လုပ်ပေးနိုင်ပါတယ်။ အ၀လွန်နေလို့ ကိုယ် အလေးချိန်လျှော့ချဖို့ ကြိုးစားနေသူတွေမှာ ခါးလုံးပတ် လျော့နည်းအောင် လုပ်ပေးနိုင်ပါတယ်။ အသည်းမှာ အဆီတွေ စုမနေအောင်လည်း ကာကွယ်ပေးပါတယ်။ အရိုးတွေမှာ သတ်္တုဓာတ်တွေပါဝင်မှု ပိုမို သိပ်သည်းပြီး ကြံ့ခိုင်မှု ပိုကောင်းစေပါတယ်။ အသက်အရွယ်ငယ်စဉ်မှာ ပန်းနာရင်ကျပ် ဝေဒနာခံစားရမှု နည်းစေပါတယ်။

          EPA ဟာ စိတ်ကျရောဂါလက်္ခဏာတွေကို သက်သာစေနိုင်တယ်။ စိတ်ကစဥ့်ကလျားရောဂါ (Schizophrenia) စတဲ့ စိတ်ရောဂါတွေ ဖြစ်နိုင်ခြေရှိသူတွေမှာ EPA က ရောဂါဖြစ်မယ့် အလားအလာနည်းသွားအောင် လုပ်ပေးနိုင်ပါတယ်လို့လည်း ဆိုပါတယ်။ အခုခေတ်မှာ ဆီးချို၊ သွေးတိုးနှင့် နှလုံးသွေးကြောရောဂါစတဲ့ နာတာရှည် ရောဂါတွေအဖြစ်များနေတဲ့ အကြောင်းရင်းတွေထဲမှာ အိုမီဂါ-၃ ဖက်တီးအက်ဆစ်စားသုံးမှု အချိုးအဆနည်းပြီး အိုမီဂါ-၆ စားသုံးမှုက အချိုးအဆများနေခြင်းဟာ အချက်တစ်ခုဖြစ်ပါတယ်။

အိုမီဂါ-၆ ဖက်တီးအက်ဆစ်များ (Omega-6 Fatty Acids)

          ဖက်တီးအက်ဆစ် မော်လီကျူးရဲ့ အဖျား (အိုမီဂါ) ပိုင်းကနေ ရေတွက်လျှင် ၆ လုံး မြောက် ကာဗွန်ဟာ ဟိုက် ဒရိုဂျင် အပြည့်အ၀ချိတ်ဆက်မနေဘူးဆိုလျှင် အဲဒီ ဖက်တီးအက်ဆစ်မျိုးကို အိုမီဂါ-၆ ဖက်တီးအက်ဆစ် လို့ခေါ်ပါတယ်။ သူတို့မှာ အမှတ်စဉ် (၆)  ကာဗွန်တစ်လုံး တည်းသာမက အခြားကာဗွန်အချို့ဟာလည်း ဟိုက်ဒရိုဂျင် မပြည့်မ၀ ချိတ်ဆက်နေတတ်ပါတယ်။ အဲဒါကြောင့် အိုမီဂါ-၆ ဖက်တီးအက်ဆစ်တွေဟာလည်း တစ်နေရာ မက မပြည့်ဝတဲ့ “ပေါ်လီ” မပြည့်ဝ (Poly-Unsaturated) ဖက်တီးအက်ဆစ်တွေ ဖြစ်ကြပါတယ်။

အိုမီဂါ-၆ ဖက်တီးအက်ဆစ်ပါဝင်သည့် အစားအစာများ

          အိုမီဂါ-၆ ဖက်တီးအက်ဆစ်တွေရနိုင်တဲ့ အပင်ထွက် အစားအစာ အများအပြား ရှိပါတယ်။ ဒါကြောင့် အစား အသောက်ကနေ အိုမီဂါ-၆ အလုံအလောက်ရဖို့ သိပ်ပူစရာ မလိုပါဘူး။ နေကြာစေ့၊ သီဟိုဠ်စေ့ စတဲ့အဆန် အစေ့အများစုနှင့် နေကြာစေ့ဆီ၊ နှမ်းဆီ၊ ပဲပုပ်ဆီ၊ ပြောင်းဆီ စတဲ့ ဟင်းသီးဟင်းရွက်ဆီတွေ အားလုံးလိုလိုမှာ ပါဝင်နေတဲ့ အိုမီဂါ-၆ ဖက်တီးအက်ဆစ်ရဲ့အမည်က Linoleic Acid-LA ဖြစ်ပါတယ်။ လူ့ခန္ဓာကိုယ်ထဲမှာ အခြားဖက်တီးအက်ဆစ်တွေကနေ LA ဖြစ်လာအောင် ပြောင်းယူလို့မရပါဘူး။ ဒါကြောင့် LA ဟာလည်း အစားအသောက်ထဲမှာ မဖြစ်မနေပါအောင် စားသုံးရမယ့် ဖက်တီးအက်ဆစ်တစ်မျိုးဖြစ်ပါတယ်။

          ၀က်သား၊ အမဲသား စတဲ့ကုန်းသတ္တ၀ါ  အဆီအသားတွေမှာပါတဲ့ အိုမီဂါ-၆ ဖက်တီးအက်ဆစ်ရဲ့ အမည်က Arachidonic acid-AA ဖြစ်ပါတယ်။ လူဟာ အပင်ထွက် အိုမီဂါ-၆ ဖက်တီးအက်ဆစ် LA ကို ခန္ဓာကိုယ်ထဲမှာ တိရစ္ဆာန်ထွက် အိုမီဂါ-၆ ဖက်တီးအက်ဆစ် AA ဖြစ်အောင် ပြောင်းနိုင်ပါတယ်။

အိုမီဂါ-၆ ဖက်တီးအက်ဆစ်များ အကျိုးပြုပုံ

          အိုမီဂါ-၆ ဖက်တီးအက်ဆစ်တွေဟာ လူ့ခန္ဓာကိုယ်ထဲမှာ ဓာတ်ပြောင်းလဲပြီး Eicosanoid ဓာတ်ပေါင်းတွေ ဖြစ်လာနိုင်ပါတယ်။ သူတို့ရဲ့အစွမ်းက အိုမီဂါ-၃ တွေရဲ့ ပြောင်းပြန်ဖြစ်ပါတယ်။ ရောင်ရမ်းမှု (Inflammation) ကို အားပေးတဲ့အစွမ်းရှိပါတယ်။ ဆူးနှင့်ခြစ်မိတဲ့ အရေပြားမှာ အနီရောင်အစင်းကြောင်းဖြစ်လာပြီး ဖူးရောင်လာတာ၊ ဓားရှတဲ့ဒဏ်ရာ၊ ရောဂါပိုးကြောင့် အာသီးရောင်တာ၊ ပြည်တည်နာဖြစ်တာ စတဲ့အခြေအနေတွေမှာ ရောင်ရမ်းလာတာတွေဟာ ၀င်လာတဲ့ ရောဂါပိုးတွေကို ခန္ဓာကိုယ်က ခုခံတိုက်ခိုက်တဲ့လုပ်ငန်းရဲ့ ရလဒ်တစ်ခု ဖြစ်ပါတယ်။ ရောဂါပိုးတွေကို လတ်တလော ခုခံ တိုက်ခိုက်မှုလုပ်ငန်းမှာ အိုမီဂါ-၆ ဖက်တီးအက်ဆစ်တွေက အားပေးတယ်လို့ အတိုချုပ် မှတ်ထားနိုင်ပါတယ်။

          အိုမီဂါ-၃ ဖက်တီးအက်ဆစ်နှင့် အိုမီဂါ-၆ ဖက်တီး အက်ဆစ်ပါတဲ့ အစားအစာတွေကို အချိုးကျကျ စားသုံးမယ်ဆိုရင် ရောင်ရမ်းမှုကို အားပေးတဲ့ အိုမီဂါ-၆ ဖက်တီးအက်ဆစ်တွေက လတ်တလောရောဂါပိုးဝင်လို့ဖြစ်ရတဲ့ ရောဂါတွေကို ခုခံတိုက်ခိုက်ရာမှာ ကူညီမှာဖြစ်ပြီး ရောင်ရမ်းမှုကို လျော့နည်းစေတဲ့ အိုမီဂါ-၃ ဖက်တီးအက်ဆစ်တွေက ကာလတာရှည် ရောင်ရမ်းမှုကြောင့် နာတာရှည် ရောဂါတွေ ဖြစ်မလာအောင် ကာကွယ်ရာမှာ ကူညီမှာ ဖြစ်ပါတယ်။ အိုမီဂါ-၃ ဖက်တီးအက်ဆစ် တစ်ဆ စားသုံးတိုင်း အိုမီဂါ-၆ ဖက်တီး အက်ဆစ်ကို အများဆုံး ၄-ဆ (၁း ၄) အထိသာ စားသုံးသင့်တယ်လို့ ပညာရှင် တွေက ယူဆကြပါတယ်။

အိုမီဂါ-၉ ဖက်တီးအက်ဆစ်များ

          ဖက်တီးအက်ဆစ်မော်လီကျူးရဲ့ အဖျား (အိုမီဂါပိုင်း) ကနေ အရင်းပိုင်းဘက်ကို ရေတွက်လာလိုက်တာ  အမှတ်စဉ် (၉) ကာဗွန်မှာ ဟိုက်ဒရိုဂျင် မပြည့်မ၀ ချိတ်ဆက်နေလျှင် အဲဒီဖက်တီးအက်ဆစ်မျိုးကို အိုမီဂါ-၉ ဖက်တီးအက်ဆစ်လို့ ခေါ်ပါတယ်။ အိုမီဂါ-၉ ဖက်တီးအက်ဆစ်တွေဟာ အမှတ်စဉ် (၉) ကာဗွန်တစ်နေရာတည်းမှာသာ မပြည့်ဝတဲ့ မိုနိုမပြည့်ဝ (Mono-Unsaturated) ဖက်တီး အက်ဆစ်တွေဖြစ်ပါတယ်။

          လူတွေစားသုံးမှုအများဆုံး အိုမီဂါ-၉ ဖက်တီး အက်ဆစ်က Oleic Acid ဖြစ်ပါတယ်။ သံလွင်ဆီ (Olive Oil) ဟာ Oleic Acid အများဆုံးပါဝင်တဲ့ ဆီတစ်မျိုးဖြစ်ပြီး မြန်မာတွေစားနေကျ ဟင်းချက်ဆီတွေထဲမှာတော့ မြေပဲဆီဟာ Oleic Acid ကြွယ်ဝပါတယ်။ လူ့ခန္ဓာကိုယ်ထဲမှာ အခြားဖက်တီးအက်ဆစ်အမျိုးအစားတွေကနေ အိုမီဂါ-၉ ဖက်တီးအက်ဆစ်ဖြစ်လာအောင် ပြောင်းယူလို့ရတဲ့အတွက် အိုမီဂါ-၉ ဖက်တီးအက်ဆစ်တွေဟာ အစားအသောက်တွေထဲမှာ မပါမဖြစ်စားသုံးရမယ့် Essential Fatty Acid မဟုတ်ပါဘူး။

          ဒါပေမဲ့ အိုမီဂါ-၉ ဖက်တီးအက်ဆစ် စားသုံးမှုများသူတွေအဖို့ ခံစားရနိုင်တဲ့ အကျိုးကျေးဇူးတွေ ရှိပါတယ်။ ဆီးချို၊ သွေးချို ဝေဒနာရှင်တွေရဲ့ သွေးထဲမှာ ထရိုင်ဂလစ် စရိုက် အဆီတွေ ၁၉ % အထိ နည်းသွားနိုင်ခြင်း၊ ကျန်းမာရေးအတွက် မကောင်းတဲ့ VLDL ကိုလက်စထရောတွေ ၂၂ % အထိ နည်းသွားစေနိုင်ခြင်း၊ အင်ဆူလင်အသုံးပြု နိုင်စွမ်း ပိုကောင်းပြီး ရောဂါထိန်းသိမ်းရတာ လွယ်ကူလာနိုင်ခြင်းတို့ ဖြစ်ပါတယ်။

အိုမီဂါ ဖက်တီးအက်ဆစ်များ ရရှိနိုင်ပုံ

          အိုမီဂါ ဖက်တီးအက်ဆစ်အားလုံးကို နေ့စဉ်စားသုံးတဲ့ အစားအစာတွေကနေ လုံလုံလောက်လောက်နှင့် အချိုးကျကျရနေရင် အကောင်းဆုံးပါပဲ။ ရှေးရှေးတုန်းကဆိုရင် လူတွေဟာ အစားအသောက်တွေကနေ အိုမီဂါ-၃ နှင့် အိုမီဂါ-၆ ဖက်တီးအက်ဆစ်တွေကို ဆတူလောက် ရခဲ့တယ်လို့ ခန့်မှန်းရပါတယ်။ အခုဆိုရင် တိရစ္ဆာန်ထွက် အဆီတွေ ဟင်းချက်ဆီတွေ စားသုံးမှုများလာတာနဲ့အမျှ အနောက်နိုင်ငံတွေမှာ အိုမီဂါ-၆ စားသုံးမှုဟာ အိုမီဂါ-၃ စားသုံးမှုရဲ့  ၁၅ ဆလောက် ရှိနေတယ်လို့ ခန့်မှန်းရပါတယ်။ ဒါကြောင့် အိုမီဂါ-၆ ဖက်တီးအက်ဆစ်တွေပါတဲ့ ဆီအမျိုးမျိုး စားသုံးမှုကို တတ်နိုင်သမျှ လျှော့ချဖို့ လိုအပ်ပါတယ်။

          အိုမီဂါ-၃ ဖက်တီး အက်ဆစ်တွေရရှိမှုကို မြှင့်တင်ဖို့ ပင်လယ်ငါးအမျိုးမျိုးကို ရက်သတ္တတစ်ပတ်မှာ နှစ်ရက် လောက်စားသုံးဖို့ ပညာရှင်တွေက ထောက်ခံကြပါတယ်။  ပင်လယ်ငါး စားသုံးမှုများခြင်းဟာ အန္တရာယ်ကင်းတယ်လို့ မပြောနိုင်ပါဘူး။ စားသုံးမှုများလျှင် သူတို့မှာပါနေတဲ့ ပြဒါးကြောင့် အဆိပ်သင့်ခြင်း (Mercury Poisoning) ဖြစ်နိုင်ပါတယ်။ အထူးသဖြင့် ကိုယ်ဝန်ဆောင်မိခင်တွေဟာ ပြဒါးဆိပ်အန္တရာယ်ရှိတဲ့ ပင်လယ်ငါးတွေစားတာထက် ပင်လယ်ငါးအဆီ (Fish Oil)ဆေးလုံးတွေ မှီဝဲခြင်းက ပိုပြီး အန်္တရာယ်ကင်းပါတယ်လို့ ဆိုသူတွေရှိပါတယ်။ ကလေးငယ်တွေ ဦးနှောက်ဖွံ့ ဖြိုးမှုအတွက် အရေးကြီးတဲ့ အိုမီဂါ-၃ ဖက်တီးအက်ဆစ် DHA ကို ကလေးနို့မှုန့်၊ ကလေးဖြည့်စွက်စာ စတဲ့အစားအသောက်တွေမှာ ဖြည့်တင်းပေးတဲ့နည်းကို သုံးနေကြပါပြီ။ လူကြီးတွေ အဆင်သင့် စားသုံးနိုင်အောင် ထုတ်လုပ်ထားတဲ့ အစားအစာတွေမှာ အိုမီဂါ-၃ ဖက်တီး အက်ဆစ်တွေ ဖြည့်တင်းပေးထားတာမျိုးလည်း ရှိနေပါပြီ။

အိုမီဂါ ဖက်တီးအက်ဆစ်များပါသည့် ငါးအဆီ ဆေးလုံးများ

          ယခုခေတ်လူတွေ စားသုံးနေတဲ့ ဆီနှင့် အဆီ အမျိုးမျိုးမှာ အိုမီဂါ-၆ ပါဝင်မှုက လုံလောက်သည်ထက် ပိုများနေပါတယ်။ အိုမီဂါ-၉ ဖက်တီးအက်ဆစ်တွေကလည်း အစားအစာတွေက ရမှသာမဟုတ်ဘဲ လူ့ခန္ဓာကိုယ် ထဲမှာ အခြားဖက်တီးအက်ဆစ်တွေကနေ ပြောင်းလဲထုတ်လုပ်နိုင်လေတော့၊ များများရချင်တယ်ဆိုရင် သံလွင်ဆီနှင့် မြေပဲဆီ စားသုံးရုံနှင့် လုံလောက်ပါတယ်။ ဆေးလုံးအနေနဲ့ မှီဝဲစားသုံးဖို့ လိုတာက အိုမီဂါ-၃ ဖက်တီးအက်ဆစ်တွေသာ ဖြစ်ပါတယ်။ ဒါကြောင့် ငါးအဆီဆေးလုံး အများအပြားမှာ EPA နှင့် DHA ဆိုတဲ့ အိုမီဂါ-၃ ဖက်တီး အက်ဆစ်တွေသာ ပါပါတယ်။

          အိုမီဂါ-၃ နှစ်ဆ၊ အိုမီဂါ-၆ တစ်ဆနှင့် အိုမီဂါ-၉ တစ်ဆ (၂း ၁း ၁) ပါဝင်တဲ့ ဆေးလုံးတွေလည်း ရှိပါတယ်။ အိုမီဂါ-၆ ပါဝင်မှုဟာ အိုမီဂါ-၃ ပါဝင်မှုရဲ့ လေးဆထက် မပိုတဲ့ ဆေးလုံးတွေလည်း ရှိပါတယ်။ အမှန်တကယ် ဖြည့်ဖို့လိုတာက အိုမီဂါ-၃ တစ်မျိုး တည်းသာဖြစ်တာမို့ အိုမီဂါမျိုးစုံပါတဲ့ ဆေးလုံးတွေက အိုမီဂါ-၃ တစ်မျိုးတည်း ပါတဲ့ ဆေးလုံးတွေထက် ပိုမကောင်းပါဘူး။ EPA နှင့် DHA ဆိုတဲ့ အိုမီဂါ-၃ ဖက်တီးအက်ဆစ်တွေဟာ ပေါ်လီမပြည့်ဝ ဖက်တီးအက်ဆစ်တွေဖြစ်တဲ့အတွက် နေရောင်နှင့် ထိတွေ့ တယ်၊ အပူနှင့်ထိတွေ့တယ်ဆိုရင် အောက်ဆီဂျင်ဓာတ်တိုး (Oxidation) ဖြစ်ပြီး ပျက်စီးတတ်ပါတယ်။ ဒါကြောင့် ငါးအဆီဆေးလုံးတွေကို ထုတ်လုပ်ရာမှာ အပူကို အနည်း ဆုံးသုံးတဲ့နည်းနှင့် ထုတ်လုပ်တာမျိုး၊ အောက်ဆီဂျင် ဓာတ်တိုးမှုကို ကာကွယ်ပေးနိုင်တဲ့ ဗီတာမင်အီး ထည့်သွင်းထုတ်လုပ်ထားတာမျိုး ဖြစ်သင့်ပါတယ်။ ဆေးလုံးတွေကို နေရောင်မထိုးတဲ့ နေရာ၊ အပူချိန်မများတဲ့နေရာတွေမှာ ထားသင့်ပါတယ်။

Facebook Comments