အမဲသားခပတ်ကြော်

အမဲသားခပတ်ကြော်

            အမဲသားခပတ်ကြော်ကို ဟင်းအနေနဲ့စားနိုင်သလို သူ့အတိုင်း ရေနွေးကြမ်းလေးနဲ့ မြည်းနိုင်ပါတယ်။ ကြော်တဲ့အခါမှာ ကြက်သွန်နီ၊ ခရမ်းချဉ်သီးနဲ့ ပဲပင်ပေါက်တို့ အလွန်မင်း ပျော့အိမသွားအောင် မီးပြင်းပြင်းနဲ့ အချိန်တိုတိုမှာ မြန်မြန်မွှေကြော်ပေးပါ။ ပအုန်းရည်သုံးရင် ပိုကောင်းပေမဲ့ မရှိလျှင် ရှလကာရည်ကို အစားထိုးနိုင်ပါတယ်။ အချဉ်ကဲမသွားအောင် ချင့်ချိန်ထည့်ပါ။

►   ပါဝင်ပစ္စည်းများ

♦   အမဲသား   –   ၁၅ဝ ဂရမ် (၁ဝ ဆယ်သားခန့်)

♦   ကြက်သွန်နီ   –   ၁ လုံးနဲ့ ၁ ခြမ်း

♦   ကြက်သွန်ဖြူ   –   ၁ မြွှာ

♦   ငရုတ်သီးအရောင်တင်မှုန့်   –   အနည်းငယ်

♦   ပဲငံပြာရည်အပျစ်   –   လက်ဖက်ရည်ဇွန်း ၁ ဇွန်း

♦   ဆား   – အနည်းငယ်

♦   မဆလာ   –   လက်ဖက်ရည်ဇွန်း တစ်ဝက်

♦   ဆီ   –   စားပွဲဇွန်း ၃ ဇွန်း

♦   နနွင်း   –   အနည်းငယ်

♦   ငရုတ်သီးခွဲခြမ်း   –   အနည်းငယ်

♦   ပအုန်းရည်   –   လက်ဖက်ရည်ဇွန်း ၂ ဇွန်း

♦   ခရမ်းချဉ်သီး   –   ၁ လုံး

♦   ပူဒီနာ   –   ၄ ခက်

♦   ပဲပင်ပေါက်   –   လက်တစ်ဆုပ်စာခန့်

►   ချက်နည်း

၁။        အမဲသားကို အမြှောင်းရှည်လေးတွေလှီးထားပါ။ ဆား၊ နနွင်းနဲ့နယ်ပြီး နာရီဝက်နှပ်ထားပါ။

၂။        ကြက်သွန်နီ၊ ကြက်သွန်ဖြူ၊ ငရုတ်သီးအရောင်တင်မှုန့်တို့ကို ထောင်းထားပါ။

၃။        ကြက်သွန်နီ ၁ လုံးကို အကွင်းလိုက်ထူထူလှီးထားပါ။ ခရမ်းချဉ်သီးကို ကြမ်းကြမ်းလှီးထား ပါ။

၎။        ပူဒီနာနဲ့ ပဲပင်ပေါက်တို့ကို ရေဆေး၊ ရေစစ်ထားပါ။

၅။        ဆီအိုးတည်ပါ။ ဆီပူတဲ့အခါ ထောင်းထားသည်တို့ကို ဆီသတ်ပါ။ မွှေးလာလျှင် အမဲသား ထည့်ကြော်ပါ။ ဆား၊ ပဲငံပြာရည်အပျစ်ထည့်မွှေပါ။ အမဲသားကျက်လျှင် ကြက်သွန်နီ အကွင်းထည့်မွှေ၊ အရောင်ကြည်လာလျှင် ခရမ်းချဉ်သီးနဲ့ ပဲပင်ပေါက်ထည့်၊ ပအုန်းရည်/ ရှလကာရည် အနည်းငယ်ဆမ်းမွှေပေးပါ။ ငရုတ်သီးခွဲခြမ်း အနည်းငယ်ထည့်ပါ။

၆။        မဆလာဖြူး၊ ပူဒီနာထည့် မီးဖိုပေါ်မှချ ပူပူနွေးနွေး သုံးဆောင်ပါ။

♦   Meemeetofu   ♦

Facebook Comments