အင်ဒိုနီးရှားခေါက်ဆွဲ (Mee Bandung)

 Sofia_1

           နိုင်ငံဒေသတိုင်းမှာ သူတို့ရိုးရာ၊ သူတို့ဓလေ့အလိုက် နာမည်ကြီးလူကြိုက်များတဲ့ ချက်နည်းလေးတွေရှိကြတယ်။ အဲဒီထဲကမှ ကိုယ့်အကြိုက်နဲ့ နီးစပ်တာလေးတွေ လေ့လာသင်ယူဖြစ်ပါတယ်။ ရိုးရိုးလေးနဲ့ ထူးခြားတဲ့အရသာရှိတဲ့ ဒီခေါက်ဆွဲလေးကိုလည်း နှစ်သက်ကြလိမ့်မယ်ထင်ပါတယ်။ ဆိုဖီယာကတော့ နှစ်ပွဲဆင့်စားဖြစ်တဲ့ ခေါက်ဆွဲလေးပါ။ ချက်စားကြည့်ရအောင်နော်။

►   ဟင်းရည်အတွက်ပါဝင်ပစ္စည်း (ဆယ်ပွဲစာ)

ဂျုံခေါက်ဆွဲအစို    –     ၂ ကီလို

ကြက်သား      –     ၅ဝဝ ဂရမ်

ငရုတ်သီးအနှစ်     –     ၂ဝဝ ဂရမ် (အရမ်းမစပ်တဲ့ ငရုတ်သီးခြောက်ကို ကြိတ်ထားတာ)

ကြက်သွန်ဖြူ       –      ၃ မြောင်း

ငါးအသားလုံး      –      ၂ ထုပ်

ပြည်ကြီးငါး (သို့) ပုစွန်      –       အနည်းငယ်

မုန်လာဥနီ      –      တစ်တောင့်

မုန်ညင်းရွက် (သို့) ပဲပင်ပေါက်     –      တစ်စည်း

ကြက်သားတုံး       –     နှစ်တုံး (Chicken Stock)

ဆား      –      လိုသလောက်

Chilli Sauce –        စားပွဲဇွန်း ၅ ဇွန်း

Tomato ketchup –         ၅ ဇွန်း

ဆီ –         ၁ဝဝ ဂရမ်

ရေ –         ၄ လီတာ

ကော်မှုန့် –         စားပွဲဇွန်း ၃ ဇွန်း

ကြက်ဥ   –     ၁ဝ လုံး

တရုတ်နံနံ      –     တစ်စည်း

ကြက်သွန်ကြော်     –      လိုသလာက်

ငရုတ်သီးချဉ်     –    လိုသလောက် (တွဲဖက်စားရန်)

 

►    ပြင်ဆင်ချက်ပြုတ်နည်း

၁။       ကြက်သားကို အတုံးသေးသေးတုံးထားပါ။ မုန်လာဥကို ခပ်ထူထူလှီးထားပါ။ ငရုတ်သီးခြောက် အပွတောင့်ကို ရေစိမ်ပြီး ကြိတ်ထားပါ။

၂။       အားလုံးအဆင်သင့်ဖြစ်ပါက ချက်မည့်အိုးတွင် ဆီထည့်ပြီး ငရုတ်သီးအနှစ်၊ ကြက်သွန်ဖြူ၊ ကြက်သားတို့ကို ဆီသတ်ပါ။

၃။       ကြက်သားကျက်ပါက ရေထည့်ပါ။ ကြက်သားတုံး Chicken Stock ထည့်ပါ။ Tomato Ketchup ၊ Chilli Sauce ထည့်ပါ။ မုန်လာဥ၊ ငါးလုံးနှင့် ပြည်ကြီးငါး (သို့) ပုစွန်ထည့်ပြီး မီးအေးအေးဖြင့် ဆူပွက်အောင်တည်ထားပါ။ အရသာလိုအပ်ပါက ဆားအနည်းငယ်ထည့်ပါ။

၎။       ဟင်းရည်အရသာကျပါက လိုအပ်သောရေပမာဏ ထပ်ထည့်ပေးပြီး ပွက်အောင်တည်ပါ။ အရသာ အပါ့အငန်မြည်းပါ။

၅။       ဆူပွက်လာပါက ကော်မှုန့်ကို ရေအနည်းငယ်ဖြင့်ဖျော်ပြီး ဟင်းရည်အိုးထဲ ဖြည်းဖြည်းလောင်းထည့်ကာ ခပ်မြန်မြန်မွှေပေးပါ။

၆။       ကြက်ဥဆယ်လုံးကို ဖောက်ထားပြီး တစ်လုံးဆီ ပုံမပျက်ချပေး ပြီးမီးပိတ်ထားပါ။ ငါးမိနစ်ခန့်ထားပြီး ကြက်ဥကျက်မှသာလျှင် ပွဲပြင်ရန်အတွက်ပြင်ဆင်ပါ။

၇။       တွဲဖက်ငရုတ်ချဉ်အတွက် ငရုတ်သီးအရှည်အပွတောင့်ကို အကွင်းလှီးပြီး Apple Cider Vinegar သို့ ရှလကာရည်နှင့် သကြား၊ ဆားတို့ထည့်ပြီးစိမ်ထားပါ။

၈။       ခေါက်ဆွဲဖျောရန် ရေဆူအိုးတည်ထားပါ။ ရေဆူတွင် ခေါက်ဆွဲ မုန်ညင်းနှင့် ပဲပင်ပေါက်ကိုဖျောပြီး ပန်းကန်တွင်ထည့်ပါ။

၉။       ဟင်းရည်အိုးထဲမှ ငါးလုံး၊ ကြက်ဥနှင့် အသားတို့က်ို မျှအောင်ခပ်ပြီး ခေါက်ဆွဲပေါ်ဆမ်းပေးပါ။ အပေါ်မှ ကြက်သွန်ကြော်နှင့် တရုတ်နံနံဖြူးပေးပြီး ငရုတ်ချဉ်နှင့် တွဲဖက်သုံးဆောင်နိုင်ပါပြီ။

Facebook Comments