အင်ဒိုနီးရှားထမင်းကြော်

အင်ဒိုနီးရှားထမင်းကြော်

            ထမင်းကြော်ကြိုက်သူမို့ ထမင်းကို အရသာ အပြောင်းအလဲ အမျိုးမျိုးထွက်အောင် ကြော်စား လေ့ရှိသူပါ။ အခု ထမင်းကြော်လေးကတော့ နာစီ ဂိုရန် ( ‘ရ’ ကို R အသံထွက်နဲ့ ထွက်ပါရန်) လို့ခေါ်တဲ့ အင်ဒိုနီးရှားထမင်းကြော်ပါ၊ အရသာကတော့ အချဉ်လေးထည့်ပေမဲ့ ချဉ်တဲ့အရသာမပေါ်လွင်ဘဲ မသိမသာချိုပြီး စပ်စပ်လေးနဲ့ မွှေးနေရပါမယ်။ မမီးက ကြက်သားကင်မွှေးမွှေးလေးကို အသုံးပြုထားပေမဲ့ အလွယ်မရှိသူများက ကြက်သားအစိမ်းကို သေးသေးတုံးပြီး ထည့်ကြော်နိုင်ပါတယ်။ မမီးတို့ မုန့်ဟင်းခါးချက်နည်းတွေ နေရာဒေသကိုလိုက်ပြီး ကွဲပြားသလိုပါပဲ။ Nasi Goreng ကလည်း နေရာဒေသကိုလိုက်ပြီး ပါဝင်ပစ္စည်း ကွဲပြားသွားပါတယ်။ အင်ဒိုနီးရှားငါးပိနဲ့ မမီးတို့ မြန်မာငါးပိနဲ့ ပြုလုပ်နည်းကွာတဲ့အတွက် အနံ့အရသာလည်း ကွာပါတယ်။ မြန်မာငါးပိနဲ့ကြော်တဲ့အတွက် မြန်မာ့နည်း Nasi Goreng ဖြစ်သွားပြီ။ မပြောင်းမလဲ အမြဲပါဝင်တဲ့အရာကတော့ Kecup Manis ဆော့စ်ပါပဲ။ အင်ဒိုထမင်းကြော်မယ်ဆို ကီးချပ်မန်နစ်ကို ချန်ထားလို့မရပါရှင်။

►   ပါဝင်ပစ္စည်းများ

♦   ထမင်းကြမ်း   –   တစ်ပန်းကန်စာ

♦   ဆား   –   အနည်းငယ်

♦   ကြက်သားမှုန့်   –   အနည်းငယ်

♦   ငံပြာရည်   –   အနည်းငယ်

♦  ABC ဆော့စ်   –   စားပွဲဇွန်း ၁ ဇွန်း (Kecup Manis)

♦   သကြား   –   အနည်းငယ်

♦   ဂေါ်ဖီ   –   ခွက်တစ်ဝက်

♦   ကြက်သွန်ဖြူ   –   ၁ – ၂ မြွှာ

♦   ကြက်သွန်နီ   –   အသေး ၁ လုံး

♦   ငါးပိ   –   အနည်းငယ်

♦   ဆီ   –   စားပွဲဇွန်း ၂ ဇွန်း

♦   ထောပတ်   –   စားပွဲဇွန်း ၁ ဇွန်း

♦   ကြက်ဥ   –   ၁ လုံး

♦   ကြက်သားကင်   –   ၅ဝ ဂရမ်ခန့်

♦   ငရုတ်သီးအကြမ်းဖတ်စပ်စပ်   –   အနည်းငယ်

♦   ငရုတ်သီး ချဉ်စပ်ဆော့စ်   –   စားပွဲဇွန်းတစ်ဝက်

►   ကြော်နည်း

၁။        ကြက်သားကင်ကို အတုံးသေးလေးများတုံး သို့မဟုတ် အသားနွှင်ထားပါ။

၂။        ဂေါ်ဖီကို မထူမပါးလှီးထားပါ။

၃။        ကြက်သွန်ဖြူ၊ ကြက်သွန်နီနဲ့ ငါးပိကို ရောထောင်းထားပါ။

၎။        ဇလုံတစ်ခုထဲမှာ ပါဝင်ပစ္စည်း ၁ ကနေ ၆ အထိထည့်ပြီး ထမင်းမကြေအောင် ဖွဖွလေး နယ်ထားပါ။

၅။        ဒယ်အိုးထဲမှာ ဆီထည့်၊ ထောပတ်ထည့်၊ ကြက်ဥဖောက်ထည့်မွှေကြော်ပါ။

            (*** အသားအစိမ်းကို သုံးမယ်ဆိုရင် ကြက်ဥကို ခပ်ဖယ်ထားပြီး အခုအချိန်မှာကြော်ပါ)

၆။        ထောင်းထားသည်များကို ဆီသတ်ပါ။ အရောင်ညိုစပြုချိန် မွှေးလာတဲ့အခါ အသင့်နယ်ထားတဲ့ ထမင်းထည့်မွှေပေးပါ။ မီးပြင်းပြင်းမှာ ဆီနှံ့စပ်အောင် အကျက်ညီအောင် ဆန်သားမကျိုးကျေအောင် ဒယ်အိုးကိုလှေ့ပေး ရင်းအသာယာမွှေပါ။

၇။        ငရုတ်သီးခွဲကြမ်း၊ ငရုတ်ချဉ်စပ်အနှစ် ထည့်မွှေပါ။ အသားကင်ထည့်မွှေပါ။ သုံးဆောင်မည့် ပန်းကန်ထဲခပ်ထည့် ပူပူနွေးနွေး သုံးဆောင်ပါ။

၈။        အချဉ်အတွက် ဂေါ်ဖီကိုပါးပါးလှီး ငရုတ်သီးစိမ်းညှပ်ထည့်၊ ဆားဖြူး၊ သံပရာရည်ညှစ်ဆမ်းပြီး တွဲဖက်သုံးဆောင်နိုင်ပါတယ်။

♦   Meemeetofu   ♦

Facebook Comments