မန်ကျည်းရွက်နှင့် တိုဟူးသုပ် (Tamarind Leave with Tofu Spicy Salad)

by Syi Lwin (Foodsgarden) for Food Magazine

          ရာသီပေါ်အစာလေးဖြစ်တဲ့ မန်ကျည်းရွက်နဲ့ တိုဟူးရောနှောသုပ်လေးကို အားလုံးပဲ သုပ်စားလို့ရအောင် ရှယ်ပေးလိုက်တယ်နော်။

ပါဝင်ပစ္စည်းများ

မန်ကျည်းရွက်  –  ၁ ခွက် (ရေဆေးပြီး အရွက်တွေြွေခထားပါ)

မြန်မာတိုဟူး  –  ၁၅ ကျပ်သား (အနေတော် ပါးပါးအပြားကြီးတွေ လှီးထားပါ)

ကြက်သွန်နီကြော်  –  လိုသလောက် (အသုပ်အပေါ်မှ ဖြူးရန်)

ဆား (သို့) အသားမှုန့်  –  အနည်းငယ်

အဆန်အစေ့  –  စားပွဲဇွန်း ၂  ၁/၂ ဇွန်း (အနည်းငယ် ကြေရုံထောင်းထားပါ)

နှမ်းစေ့  –  လက်ဖက်ရည်ဇွန်း ၁ ဇွန်း (လှော်ပြီးသား)

နေကြာဆီ  –  လိုသလောက် (တိုဟူး ကြော်ရန်)

အသုပ်ဆီချက်လုပ်ရန်

ငရုတ်သီးခွဲခြမ်း  –  လက်ဖက်ရည်ဇွန်း ၃ ဇွန်း

နေကြာဆီ  –  စားပွဲဇွန်း ၂  ၁/၂ ဇွန်း (ကိုယ့်စိတ်ကြိုက် အတိုးအလျှော့လုပ်ပါ)

နနွင်းမှုန့်  –  လက်ဖက်ရည်ဇွန်း ၁/၂ ဇွန်း

ငံပြာရည်  –  လက်ဖက်ရည်ဇွန်း ၂  ၁/၂ ဇွန်း

ကြက်သွန်ဖြူ  –  ၄ မြွှာ (ခပ်ပါးပါး လှီးထားပါ)

ပြုလုပ်နည်း

၁။       ဒယ်အိုးထဲ ဆီပူအောင် တည်ပါ။ ဆီပူလျှင် လှီးထားသော တိုဟူးများကို အပေါ်ယံကျက်ရုံ ကြော်ပါ။ နှစ်ဖက်စလုံး အရောင်အညီကြော်ပါ။ ဆီစစ်ပြီး အအေးခံထားပါ။ အေးလျှင် အချောင်းလေးတွေ လှီးထားပါ။

၂။       ဒယ်အိုးအကြီးထဲ ဆီချက်လုပ်ရန် ဆီအပူပေးပါ။ ဆီပူလျှင် နနွင်းမှုန့်နှင့် ကြက်သွန်ဖြူ ထည့်တည်ပါ။ ကြက်သွန်ဖြူ အနည်းငယ် ရွှေရောင်သန်းလာလျှင် တခြားပါဝင်ပစ္စည်းများ အားလုံးထည့်ပြီး ငရုတ်သီးမှုန့် ကျက်သည်အထိ တည်ပါ။ မီးဖိုပေါ်မှချပြီး အအေးခံထားပါ။

၃။       ဖန်ဇလုံအကြီးထဲ မန်ကျည်းရွက်၊ တိုဟူးနှင့် ကျန်ပါဝင်ပစ္စည်းများ ကိုယ့်စိတ်ကြိုက် အရသာအတိုင်း ထည့်ပြီး နှံ့အောင်နယ်ပါ။ စားမြည်းပါ။ အပေါ့အငန်၊ အချဉ်အစပ် ကိုယ့်စိတ်ကြိုက် ပြုပြင်နိုင်ပါတယ်။ လတ်လတ်ဆတ်ဆတ် ချက်ချင်းစားပါ။ ထမင်းနှင့် သုံးဆောင်လျှင်လည်း ထမင်းမြိန်စေပါတယ်။

*  မှတ်ချက်- အဆန်အစေ့ဆိုသည်မှာ မြေပဲ၊ ဗာဒံစေ့၊ သီဟိုဠ်စေ့၊ ဟေဇယ်သီးတို့ကို ဆိုလိုပါသည်။

www.facebook.com/Syi Foodsgarden

Facebook Comments