ပုစွန် ခရမ်းသီးနှင့် မျှစ်ချက် (Prawn with Eggplant and Bamboo Shot)

by Syi Lwin (Foods Garden) for Food Magazine

          ဆီပြန်ဟင်းတွေစားရတာ အီစိမ့်လာသူများအတွက် ဟင်းသီးဟင်းရွက်နှင့် ပုစွန်ရောချက်ရင် အရည်သောက်ဆမ်းမျိုး စားသုံးလို့ ရတာကြောင့် ထမင်းဝိုင်းမှာ ဟင်းတွေ အများကြီး ချက်စရာမလိုလို့ အဆင်ပြေစေတဲ့ဟင်းဖြစ်ပါတယ်။

ပါဝင်ပစ္စည်းများ

ပုစွန်အသေး  –  ၂၅ ကျပ်သား (ခေါင်ြးွေခ၊ အမြီးခြွေထားပါ)

နံနံပင်  –  ၅ ပင် (ခပ်ကြမ်းကြမ်းလေး လှီးထားပါ)

ငရုတ်သီးမှုန့်  –  လက်ဖက်ရည်ဇွန်း ၁  ၁/၂ ဇွန်း

ကြက်သွန်အနှစ်  –  စားပွဲဇွန်း ၃ ဇွန်း (ကြက်သွန်ဖြူ/နီ၊ ချင်းထောင်း)

ငံပြာရည်  –  စားပွဲဇွန်း ၁- ၂ ဇွန်း

နနွင်းမှုန့်  –  လက်ဖက်ရည်ဇွန်း ၁ ဇွန်း

ခရမ်းသီး  –  ၂ လုံး (အခွံနွှာပြီး တစ်ခါကိုက်အတုံးများ တုံးထားပါ)

ခရမ်းချဉ်သီး  –  ၂ လုံး (အရှည်လိုက် ပါးပါးလှီးထားပါ)

ပဲသီးရှည်  –  ၁ စည်း (လက်နှစ်ဆစ်အရွယ်  တစောင်းပိုင်းထားပါ)

မျှစ်  –  ၅ ကျပ်သား (အမျှင်ခြစ်ပြီးသား)

ဆား  –  အနည်းငယ်

မန်ကျည်းနှစ်  –  စားပွဲဇွန်း ၁ -၂ ဇွန်း

စိမ်းစားငါးပိ  –  လက်ဖက်ရည်ဇွန်း ၂ ဇွန်း

ဆီ  –  စားပွဲဇွန်း ၁  ၁/၂ ဇွန်း

ရေ  –  အနည်းငယ်

ပြုလုပ်နည်း

          ဇောက်နက်အိုးထဲ ဆီ၊ ကြက်သွန်အနှစ်၊ နနွင်းမှုန့်နှင့် ငံပြာရည်တို့ကို ထည့်ပြီး ဆီသတ်ပါ။ ကြက်သွန်အနှစ်မွှေးလာလျှင် ပုစွန်နှင့် ခရမ်းချဉ် သီးတို့ကို ထည့်ပြီး အခွံလိပ်သည်အထိ တည်ပါ။ ခရမ်းချဉ်သီး အခွံလိပ်လျှင် မျှစ်နှင့် ရေအနည်းငယ် ထည့်တည်ပါ။ ရေခန်းလာလျှင်  ကျန်ပါဝင်ပစ္စည်း များအားလုံး ထည့်ပြီး ရေ ၁ ခွက်၊ ၂ ခွက်လောက် ထည့်၍ တည်ပါ။ ရေဆူလာလျှင် သေချာမွှေပါ။ ဆားမြည်း၍ လိုတာထပ်ဖြည့်ပြီး မီးပိတ်ကာ နံနံပင်အုပ်ပါ။ ထမင်းဖြူပူပူလေးဖြင့် အတူတွဲပြီး သုံးဆောင်နိုင်ပါပြီ။

www.facebook.com/Syi Foodsgarden

Facebook Comments