နန်တုန်

by Meemeetofu for Food Magazine

          ငယ်ငယ်တုန်းက ဆောင်းတွင်းမှာ ဝက်ခြေထောက်စွပ်ပြုတ်ရည် လက်ကျန်လေးတွေက ရာသီအေးတော့ ဂျယ်လို အခဲတုန်တုန်လေးတွေ ဖြစ်သွားကြတယ်။ အဲဒါလေးတွေကို အချဉ်လေးနဲ့ တို့ပြီး စားခဲ့ကြတယ်။ အခုနောက်ပိုင်း မြန်မာပြည်အောက်ပိုင်းမှာ ဆောင်းဆိုရင်  မအေးတော့ဘူး။ နန်တုန်လုပ်ချင်ရင်  ရေခဲသေတ္တာထဲ ထည့်မှ ခဲတော့တယ်။ မမီးက ဝက်နားရွက်သုပ်စားဖို့ ပြုတ်ရာမှာ ပြုတ်ရည်အကျန်လေးတွေက နန်တုန်လေးတွေဖြစ်သွားလို့ နန်တုန်ပြုလုပ်နည်း မေးနေခဲ့သူတွေလည်းရှိလို့ ရေးသားဖော်ပြပေးလိုက်ပါတယ်။

          နန်တုန်လုပ်မယ်ဆိုရင် ကြက်ခြေထောက်၊ ဝက်ခြေထောက်၊ ဝက်နားရွက် စသည်တို့နဲ့ လုပ်လို့ရပါတယ်။

ပါဝင်ပစ္စည်းများ

ဝက်နားရွက်  –  ၄၀ဝ ဂရမ် ( ၂၀ ကျပ်သားခန့်)

ချင်း  –  ၂ ပြား (ပါးပါးလှီး)

ကြက်သွန်ဖြူ  –  ၃ မြွှာ

ပဲငံပြာရည် အကျဲ  –  စားပွဲဇွန်း ၁ ဇွန်း

ခရုဆီ  –  အနည်းငယ်

ဆား  –  သင့်ရုံ

သကြား  –  လက်ဖက်ရည်ဇွန်း ၁ ဇွန်း

တရုတ်နံနံ  –  ၂ ပင်

ပြုလုပ်နည်း

၁။       ဝက်နားရွက်ကို သန့်စင်အောင် ဆေးပါ။ ရေဆူဆူထဲ ထည့်ပြုတ်၍ ပြန်ဆယ်ယူပြီး ဝက်နားရွက်ရဲ့ ညစ်နေတဲ့နေရာတွေကို ဖွဖွလေး ခြစ်ထုတ်ပါ။ ရေဆူဆူထဲ ပြန်နှစ်ဆေးကာ ရေအေးနဲ့ လောင်းချပြီး ဆေးပါ။

၂။       ဝက်နားရွက်ကို ပြုတ်မည့်အိုးထဲ ထည့်ပါ။ ဆား၊ သကြား၊ ချင်း၊ ကြက်သွန်ဖြူနှင့် ရေကို ထည့်ပြုတ်ပါ။ ဝက်နားရွက်နူးလျှင် ဆယ်ယူပြီး အအေးခံပါ။ ဝက်နားရွက်ပြုတ်ရည်ကို အအေးခံပါ။

၃။       ဝက်နားရွက်အေးလျှင် ပါးပါးနုပ်နုပ်လေးများ လှီးပါ။ ရလာတဲ့ ဝက်နားရွက်လေးများကို အတုံးသေးသေး နုပ်နုပ်လေးလေး ပြန်လှီးပါ။

၎။       အအေးခံမည့်ခွက်ထဲ ဝက်နားရွက်များထည့်ပြီး ပြုတ်ရည်ထည့်ပါ။ တရုတ်နံနံ နုပ်နုပ်စဉ်းပြီး ထည့်ပါ။ ရေခဲသေတ္တာအအေးထပ်မှာ ၂ နာရီခန့်ထားပါ။ ခဲသွားလျှင် အချဉ်ရည်ဆမ်းပြီး သုံးဆောင်ပါ။

အချဉ်ရည်ပြုလုပ်ရန်

ပါဝင်ပစ္စည်းများ

ကြက်သွန်ဖြူ  –  ၄ မြွှာ

ငရုတ်သီးစိမ်း  –  ၄ တောင့်

ပဲငံပြာရည်အကျဲ  –  သင့်ရုံ

ဆား  –  သင့်ရုံ

သကြား  –  လက်ဖက်ရည်ဇွန်း ၁/၂ ဇွန်း

သံပရာသီး  –  ၁ ခြမ်း

ပြုလုပ်နည်း

၁။       ကြက်သွန်ဖြူ၊ ငရုတ်သီးစိမ်း၊ ဆားနှင့် သကြားတို့ကို ရောပြီး မညက်တညက် ထောင်းပါ။

၂။       ပဲငံပြာရည်ထည့်ပြီး ရောမွှေပါ။

၃။       သံပရာရည်ညှစ်ပါ။

၎။       အရည်ကျဲကျဲလိုလျှင် ရေအနည်းငယ်ရောပါ။

Facebook Comments