စပါကတီ

စပါကတီ

        စပါကတီ ဘယ်လိုလုပ်လည်း မကြာခဏမေးကြတယ်။ ဒီမှာတော့ Pasta Sauce တွေ အလွယ်ဝယ်လို့ရနေတော့ လုပ်စားရတာ အဆင်ပြေတယ်။ Pasta Sauce ဝယ်မရသူတို့အတွက် ဆော့စ်ချက်ပုံလေး ရေးပေးမယ်နော်။ ခရမ်းချဉ်သီးမှည့်မှည့်ကိုသုံးရင် အချိုလေးပြီး အချဉ်ပေါ့တဲ့အတွက် မမီးက ပင်မှည့်ခရမ်းချဉ်သီးကို သုံးလေ့ရှိပါတယ်။

►   ပါဝင်ပစ္စည်းများ (၂ပွဲစာ)

♦      စပါကတီပါစတာခြောက်   –   ၁ဝ ဆယ်သားခန့် (၁၅ဝ ဂရမ်)

♦      ခရမ်းချဉ်သီးမှည့်   –   ၃ဝ ဆယ်သား ( ၅ဝဝ ဂရမ်)

♦      ကြက်သွန်နီ   –   ၂ လုံး

♦      ကြက်သွန်ဖြူ   –   ၂ မြွှာ

♦      သံလွင်ဆီ   –   စားပွဲဇွန်း ၃ ဇွန်း

♦      ဆား   –   အနည်းငယ်

♦      သကြား   –   အနည်းငယ်

♦      အော်ရက်ဂနို အခြောက်မှုန့်   –   လက်ဖက်ရည်ဇွန်း တစ်ဝက်

♦      စမုန်စပါးလှော်ထောင်း   –  လက်ဖက်ရည်ဇွန်း တစ်ဝက်

♦      ကြက်သား/အမဲသား/ပုစွန်   –   ၁၅ ကျပ်သား ( ၂၅ဝ ဂရမ်ခန့်)

♦      ပါ့စ်လီ အဖျားပိုင်း   –   ၅ ခက်

►   ချက်နည်း

၁။    စပါကတီပါစတာခြောက်ကို ရေဆူတွင် ဆားအနည်းငယ်ထည့်ပြီး ပြုတ်ပြီး ရေစစ်ထားပါ၊ ကပ်မသွားအောင် ဆီလူးထားပါ။

၂။    ခရမ်းချဉ်သီးမှည့်ကို အညှာနေရာနေ လေးစိတ်ခွဲ ဓားရာလေးပေးပြီး အစေ့ညှစ်ထုတ်၊ ဆန်ခါပေါ်တင်ပြီး ရေနွေးငွေ့နဲ့ပေါင်းပါ။ အခွံလန်သွားရင် ဆယ်ပြီး အအေးခံပါ၊ အခွံနွှာပြီး အသားကို ကြိတ်ပါ။

၃။    အသားကို တောက်တောက်စဉ်းထားပါ။ (ရယ်ရီမိတ် Meat Ball တွေကိုလည်း အသုံးပြုနိုင်ပါတယ်)

၎။    ကြက်သွန်နီကို ပါးပါးလှီးထားပါ။

၅။    ကြက်သွန်ဖြူကို ဓားပြားရိုက်၊ နုပ်နုပ်စဉ်းထားပါ။

၆။    ပါ့စ်လီအဖျားပိုင်းများကို ကြမ်းကြမ်းလှီးထားပါ။ (အရင်းပိုင်းက အရိုးမပါရ)

၇။    အိုးတွင် ဆီထည့်ပါ။ ကြက်သွန်နီကို အသားပျော့လာတဲ့အထိ ကြော်ပါ။ ကြက်သွန်ဖြူ၊ အော်ရက်ဂနို၊ စမုန်စပါးအမှုန့်တို့ ထည့်မွှေပေးပါ၊ မွှေးလာတဲ့အခါ တောက်တောက်စဉ်းထားတဲ့ အသားထည့်မွှေပါ။ အသားကျစ်သွားတဲ့အခါ ခရမ်းချဉ်သီးအနှစ်ထည့်ပါ။ ဆား၊ သကြားထည့်ပါ။ မီးအေးအေးဖြင့် နှပ်ထားပါ။ လိုအပ်လျှင် ရေ (အရိုးပြုတ်အချိုရည်) အနည်းငယ်ထည့်ပါ။ ဆော့စ်က ခပ်ပျစ်ပျစ်လေး ဖြစ်နေရပါတယ်။

၈။    အသားကျက်ပြီဆိုလျှင် ငရုတ်ကောင်းထည့်မွှေ၊ အသင့်ပြင်ထားတဲ့ ခေါက်ဆွဲထည့်ပြီး ရောမွှေပေးပါ။ ပန်းကန်တွင် ပြောင်းထည့်ပါ၊ ပါ့စ်လီအရွက်လေးများဖြူးပါ၊ Parmesan Cheese အမှုန့်လေးကြိုက်လျှင် ဖြူးစားပါ၊ အစပ်ကြိုက်လျှင် ငရုတ်သီးအခြောက်မှုန့်လေး ဖြူးစားနိုင်ပါတယ်။ (မြန်မာငရုတ်လှော်ထောင်းမဟုတ်ပါ၊ နေရောင်နဲ့အခြောက်ခံထားတဲ့ ငရုတ်သီး အစပ်တောင့်သန့်သန့်ကို ခပ်ကြမ်းကြမ်းကြိတ်ထားတာပါ)

♦   Meemeetofu   ♦

Facebook Comments